നിരവധി തവണ മാറ്റിവെച്ച ആക്‌സിയോം-4 ബഹിരാകാശ ദൗത്യത്തിന് പുതിയ വിക്ഷേപണ തീയതി പ്രഖ്യാപിച്ചു. നാസ, ആക്‌സിയോം സ്പേസ്, സ്പേസ് എക്‌സ് എന്നിവർ ചേർന്ന് നടത്തുന്ന ഈ ദൗത്യം 2025 ജൂൺ 25 ബുധനാഴ്ച രാവിലെ 2:31 AM EDT (ഇന്ത്യൻ സമയം ഉച്ചയ്ക്ക് 12:10) വിക്ഷേപിക്കാൻ ലക്ഷ്യമിടുന്നു. ഫ്ലോറിഡയിലെ കെന്നഡി സ്പേസ് സെന്ററിൽ നിന്നാണ് വിക്ഷേപണം.
ആറ് തവണയാണ് ഈ ദൗത്യത്തിന്റെ വിക്ഷേപണം മാറ്റിവെച്ചത്. മെയ് 29-നായിരുന്നു ആദ്യ വിക്ഷേപണ തീയതി നിശ്ചയിച്ചിരുന്നത്. പിന്നീട് കാലാവസ്ഥാ പ്രശ്‌നങ്ങൾ, ഫാൽക്കൺ-9 റോക്കറ്റിലെ ലിക്വിഡ് ഓക്സിജൻ ചോർച്ച, രാജ്യാന്തര ബഹിരാകാശ നിലയത്തിലെ സർവീസ് മൊഡ്യൂളിലെ സാങ്കേതിക തകരാറുകൾ എന്നിവ കാരണം പലതവണ മാറ്റിവെക്കേണ്ടി വന്നു.
ഇന്ത്യൻ ബഹിരാകാശ സഞ്ചാരി ശുഭാംശു ശുക്ല ഉൾപ്പെടെയുള്ള സംഘമാണ് ഈ ദൗത്യത്തിൽ അന്താരാഷ്ട്ര ബഹിരാകാശ നിലയത്തിലേക്ക് യാത്ര ചെയ്യുന്നത്. ഈ ദൗത്യം ബഹിരാകാശ സഞ്ചാര ചരിത്രത്തിലെ ഒരു സുപ്രധാന ചുവടുവെപ്പായി കണക്കാക്കപ്പെടുന്നു. എല്ലാ സാങ്കേതിക പ്രശ്നങ്ങളും പരിഹരിച്ച സാഹചര്യത്തിൽ ദൗത്യം വിജയകരമാകുമെന്ന പ്രതീക്ഷയിലാണ് ശാസ്ത്രലോകം.
