ക്രിക്കറ്റ് ഇതിഹാസം സച്ചിൻ തെൻഡുൽക്കറുടെ ടെസ്റ്റ് റൺസ് റെക്കോർഡുകൾ മറികടക്കാൻ സാധ്യതയുള്ള താരങ്ങളായി വിരാട് കോലിയുടെയും രോഹിത് ശർമയുടെയും പേരുകളാണ് പലപ്പോഴും ഉയർന്നു കേട്ടിരുന്നത്. എന്നാൽ, എല്ലാ പ്രവചനങ്ങളെയും അപ്രസക്തമാക്കിക്കൊണ്ട് ഇംഗ്ലണ്ട് താരം ജോ റൂട്ട് തന്റെ 38–ാം ടെസ്റ്റ് സെഞ്ചറി നേടി ടെസ്റ്റ് ക്രിക്കറ്റിൽ ഏറ്റവും കൂടുതൽ റൺസ് നേടുന്ന രണ്ടാമത്തെ താരമായി മാറിയിരിക്കുകയാണ്. 157 മത്സരങ്ങളിൽ നിന്ന് 13401* റൺസുമായി സച്ചിന് (15921 റൺസ്) തൊട്ടുപിന്നിലെത്തിയ റൂട്ടിന് ഇനി വെറും 2520 റൺസ് മാത്രം മതി സച്ചിന്റെ റെക്കോർഡ് മറികടക്കാൻ.
മാഞ്ചസ്റ്ററിൽ നടന്ന ഇന്ത്യക്കെതിരായ നാലാം ടെസ്റ്റിന്റെ മൂന്നാം ദിനം ജോ റൂട്ടിന്റെ (150) തകർപ്പൻ പ്രകടനത്തിന്റെ ബലത്തിൽ ഇംഗ്ലണ്ട് 5 വിക്കറ്റിന് 500 റൺസ് എന്ന നിലയിലെത്തി. ഒലീ പോപ്പുമായും (71) ബെൻ സ്റ്റോക്സുമായും മികച്ച കൂട്ടുകെട്ടുകൾ പടുത്തുയർത്തി റൂട്ട് ഇംഗ്ലണ്ടിന് 142 റൺസിന്റെ നിർണായക ലീഡ് നേടിക്കൊടുത്തു. ഇന്ത്യൻ ബോളർമാരെ നിഷ്പ്രഭരാക്കിക്കൊണ്ട് റൂട്ട് ക്ലാസിക്കൽ ടെസ്റ്റ് ശൈലിയിൽ കാഴ്ചവെച്ച ബാറ്റിംഗ് പ്രകടനം ഇംഗ്ലണ്ടിന് മത്സരത്തിൽ മേൽക്കൈ നേടിക്കൊടുത്തു.
ടെസ്റ്റ് കരിയറിലെ സെഞ്ചറി നേട്ടത്തിൽ റിക്കി പോണ്ടിങ് (41), ജാക്ക് കാലിസ് (45), സച്ചിൻ തെൻഡുൽക്കർ (51) എന്നിവർ മാത്രമാണ് ഇപ്പോൾ റൂട്ടിന് മുന്നിലുള്ളത്. റൂട്ടിന്റെ ഈ പ്രകടനം ക്രിക്കറ്റ് ലോകത്ത് വലിയ ചർച്ചകൾക്ക് വഴിവെച്ചിട്ടുണ്ട്.
