കോപ്പ ബൊളീവിയ ഫുട്ബോൾ ടൂർണമെന്റിൽ ബൊളീവിയൻ ക്ലബ്ബുകളായ ബ്ലൂമിംഗും നാഷണൽ പോട്ടോസിയും തമ്മിൽ നടന്ന മത്സരത്തിനിടെ വൻ സംഘർഷം. ഫുട്ബോൾ ചരിത്രത്തിൽ അപൂർവ്വമായി മാത്രം സംഭവിക്കുന്ന രീതിയിൽ, മത്സരം നിയന്ത്രിച്ചിരുന്ന റഫറിക്ക് കളിക്കാർക്കും ഒഫീഷ്യൽസിനുമായി 17 ചുവപ്പ് കാർഡുകൾ പുറത്തെടുക്കേണ്ടി വന്നു. കളി അവസാനിക്കുന്നതിന് തൊട്ടുമുമ്പാണ് സംഘർഷം ഉടലെടുത്തത്. കളിക്കാർ തമ്മിലുള്ള വാക്കേറ്റത്തിൽ ആരംഭിച്ച പ്രശ്നം പെട്ടെന്ന് തന്നെ കൈയാങ്കളിയിലേക്ക് നീങ്ങുകയായിരുന്നു.
കളിക്കാർ പരസ്പരം വാക്കുകൾ കൊണ്ടും കൈകൾ കൊണ്ടും ഏറ്റുമുട്ടിയതോടെ ഗ്രൗണ്ടിൽ വലിയൊരു കൂട്ടത്തല്ലിന്റെ പ്രതീതിയായി. ഇതോടെ മത്സരം നിയന്ത്രിക്കാൻ റഫറിമാർക്ക് സാധിക്കാതെ വന്നു. പ്രശ്നത്തിൽ ടീമുകളുടെ ഒഫീഷ്യൽസും പരിശീലകരും ഇടപെട്ടതോടെ രംഗം കൂടുതൽ വഷളായി. ഒടുവിൽ സ്ഥിതിഗതികൾ നിയന്ത്രണത്തിലാക്കാൻ പോലീസിന് കണ്ണീർ വാതകം പ്രയോഗിക്കേണ്ടി വന്നു. കളിക്കാരും പരിശീലകരും ആരാധകരുമായി ഏകദേശം 30 പേർക്കാണ് സംഘർഷത്തിൽ പരിക്കേറ്റത്.
ആദ്യപകുതിയിൽ ഒരു ഗോളിന് ബ്ലൂമിംഗ് മുന്നിലായിരുന്നെങ്കിലും, രണ്ടാം പകുതിയിൽ പോട്ടോസി രണ്ട് ഗോളുകൾ നേടി 2-1ന് ലീഡ് പിടിച്ചിരുന്നു. ഈ ഘട്ടത്തിൽ, കളിയുടെ അവസാന മിനിറ്റുകളിലാണ് സംഘർഷം പൊട്ടിപ്പുറപ്പെട്ടത്. റെഫറിയുടെ ചില തീരുമാനങ്ങളോടുള്ള പ്രതിഷേധവും, ഇരു ടീമുകളും തമ്മിൽ നിലനിന്നിരുന്ന വൈര്യവുമാണ് പ്രശ്നം ഇത്രയും വലിയ സംഘർഷത്തിലേക്ക് എത്താൻ പ്രധാന കാരണം. ഗ്രൗണ്ടിലും സൈഡ് ലൈനിലുമായി ഇരുടീമുകളിലെയും ഭൂരിഭാഗം പേർക്കും ചുവപ്പ് കാർഡ് ലഭിച്ചു.
ഈ സംഭവത്തോടെ ബൊളീവിയൻ ഫുട്ബോളിന്റെ ചരിത്രത്തിലെ ഏറ്റവും മോശം മത്സരങ്ങളിലൊന്നായാണ് ഈ മത്സരം അറിയപ്പെടുന്നത്. 17 ചുവപ്പ് കാർഡുകൾ ലഭിച്ച സംഭവം ഫിഫയുടെ ശ്രദ്ധയിൽ വന്നിട്ടുണ്ട്. കളിക്കാർക്കും ടീമുകൾക്കുമെതിരെ ശക്തമായ അച്ചടക്ക നടപടികൾ ഉണ്ടാകുമെന്നാണ് സൂചന. ഫുട്ബോളിന്റെ സ്പോർട്സ്മാൻ സ്പിരിറ്റിന് വിരുദ്ധമായ ഈ നടപടി ലോകമെമ്പാടുമുള്ള കായിക പ്രേമികൾക്കിടയിൽ വലിയ ചർച്ചയായി മാറിയിരിക്കുകയാണ്.
