ലോക ഫുട്ബോളിലെ ഇതിഹാസതാരം ലയണൽ മെസ്സി ഇന്ത്യ സന്ദർശിക്കുമെന്ന് ഔദ്യോഗികമായി പ്രഖ്യാപിച്ചത് ആരാധകർക്ക് ആവേശമായി. ഈ വർഷം ഡിസംബറിൽ ‘ഗോട്ട് ടൂർ ഓഫ് ഇന്ത്യ 2025’ (GOAT Tour of India 2025) എന്ന പരിപാടിയുടെ ഭാഗമായാണ് മെസ്സി എത്തുന്നത്. 14 വർഷത്തെ നീണ്ട ഇടവേളയ്ക്ക് ശേഷമാണ് അർജന്റീനിയൻ നായകൻ ഇന്ത്യൻ മണ്ണിൽ വീണ്ടും എത്തുന്നത്. ഇന്ത്യയെ ഒരു ‘അതിഗംഭീര ഫുട്ബോൾ രാജ്യമായി’ വിശേഷിപ്പിച്ച മെസ്സി, ഇവിടത്തെ ആരാധകരെ കാണാൻ താൻ ആകാംക്ഷയോടെ കാത്തിരിക്കുകയാണെന്നും കൂട്ടിച്ചേർത്തു.
ഇന്ത്യൻ സന്ദർശനം തനിക്ക് ഒരു വലിയ അംഗീകാരമായി കാണുന്നുവെന്ന് മെസ്സി ഔദ്യോഗിക പ്രസ്താവനയിൽ അറിയിച്ചു. “ഈ യാത്ര നടത്താൻ കഴിയുന്നത് എനിക്ക് വലിയ ബഹുമതിയാണ്. ഇന്ത്യ വളരെ സവിശേഷമായ ഒരു രാജ്യമാണ്. 14 വർഷം മുമ്പ് ഞാൻ ഇവിടെ വന്നപ്പോൾ ലഭിച്ച നല്ല ഓർമ്മകൾ എനിക്കുണ്ട്, അവിടുത്തെ ആരാധകർ അവിശ്വസനീയമായിരുന്നു,” മെസ്സി പറഞ്ഞു. “ഇന്ത്യ ഒരു അഭിനിവേശമുള്ള ഫുട്ബോൾ രാജ്യമാണ്, ഈ മനോഹരമായ കളിയോടുള്ള എന്റെ സ്നേഹം പങ്കുവെച്ച് ഒരു പുതിയ തലമുറയിലെ ആരാധകരെ കാണാൻ ഞാൻ ആകാംക്ഷയോടെ കാത്തിരിക്കുന്നു,” എന്നും അദ്ദേഹം കൂട്ടിച്ചേർത്തു.
ഡിസംബർ 13 മുതൽ 15 വരെ നാല് പ്രധാന നഗരങ്ങളിലായാണ് മെസ്സിയുടെ പര്യടനം തീരുമാനിച്ചിരിക്കുന്നത്. കൊൽക്കത്തയിൽ നിന്നാണ് പര്യടനം ആരംഭിക്കുക. തുടർന്ന് അഹമ്മദാബാദ്, മുംബൈ, ന്യൂഡൽഹി എന്നിവിടങ്ങളിലേക്കും മെസ്സി യാത്ര ചെയ്യും. 2011-ൽ വെനസ്വേലയ്ക്കെതിരെ കൊൽക്കത്തയിലെ സാൾട്ട് ലേക്ക് സ്റ്റേഡിയത്തിൽ നടന്ന സൗഹൃദ മത്സരത്തിലാണ് ഇതിനുമുമ്പ് മെസ്സി ഇന്ത്യയിൽ കളിച്ചത്. ഇത്തവണത്തെ പര്യടനത്തിൽ പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തുന്നതും മെസ്സിയുടെ ഷെഡ്യൂളിൽ ഉൾപ്പെടുത്തിയിട്ടുണ്ട്.
മെസ്സിയുടെ ‘ഗോട്ട് ടൂർ ഓഫ് ഇന്ത്യ’യിൽ ഫുട്ബോൾ ഇവന്റുകൾ, സംഗീത പരിപാടികൾ, ആരാധകരുമായുള്ള കൂടിക്കാഴ്ചകൾ, ഫുട്ബോൾ മാസ്റ്റർ ക്ലാസുകൾ തുടങ്ങിയവ ഉണ്ടാകും. കൊൽക്കത്തയിൽ നടക്കുന്ന ‘ഗോട്ട് കപ്പ്’ മത്സരത്തിൽ സൗരവ് ഗാംഗുലി, ബൈച്ചുങ് ബൂട്ടിയ, ലിയാൻഡർ പേസ് തുടങ്ങിയ ഇന്ത്യൻ കായിക താരങ്ങളോടൊപ്പം മെസ്സി കളിക്കുമെന്നാണ് പ്രതീക്ഷിക്കുന്നത്. ഫുട്ബോൾ പ്രേമികൾക്ക് ലോകോത്തര താരത്തെ നേരിൽ കാണാൻ ലഭിക്കുന്ന ഈ അവസരം രാജ്യത്തെ കായിക ലോകത്തിന് വലിയ ആവേശമാണ് നൽകുന്നത്.
