ഇന്ത്യൻ ക്രിക്കറ്റിലെ ഇതിഹാസ താരങ്ങളായ വിരാട് കോഹ്ലിയും രോഹിത് ശർമ്മയും ഓസ്‌ട്രേലിയയ്‌ക്കെതിരായ ഏകദിന പരമ്പരയ്ക്ക് മുന്നോടിയായി പരിശീലനത്തിൽ കാഴ്ചവെച്ച പ്രകടനം ആരാധകർക്കും ടീം മാനേജ്‌മെന്റിനും ഒരുപോലെ ആവേശം നൽകുന്നതാണ്. ഇരുവരും വൈറ്റ് ബോൾ ക്രിക്കറ്റിൽ നിന്ന് ഉടൻ വിരമിക്കുമോ എന്ന തരത്തിലുള്ള അഭ്യൂഹങ്ങൾ ശക്തമായി നിലനിൽക്കെയാണ്, അതിനെ അസ്ഥാനത്താക്കിക്കൊണ്ട് പരിശീലനത്തിൽ മിന്നുന്ന ഫോം പ്രകടിപ്പിച്ചത്. പെർത്തിൽ നടന്ന നെറ്റ്സ് പരിശീലനത്തിൽ ഇരുവരും മികച്ച പ്രകടനമാണ് കാഴ്ചവെച്ചതെന്നും, ഇത് വരാനിരിക്കുന്ന നിർണ്ണായക പരമ്പരയിൽ ഇന്ത്യക്ക് വലിയ പ്രതീക്ഷ നൽകുന്നുവെന്നുമാണ് റിപ്പോർട്ടുകൾ.
നെറ്റ്സ് പരിശീലനത്തിൽ ഏകദേശം 30 മിനിറ്റിലധികം സമയം ചെലവഴിച്ച ഇരുവരും മികച്ച ടൈമിങ്ങോടെയാണ് ബാറ്റു ചെയ്തത്. നിലവിലെ ഇന്ത്യൻ ടീമിൻ്റെ പരിശീലകൻ കൂടിയായ ഗൗതം ഗംഭീറിനെ വരെ സന്തോഷിപ്പിക്കുന്ന തരത്തിലായിരുന്നു കോഹ്ലിയുടെയും രോഹിത്തിൻ്റെയും പ്രകടനം. രോഹിത് ശർമ്മ വലിയ ഷോട്ടുകളടക്കം കളിച്ച് തൻ്റെ പതിവ് ‘ഹിറ്റ്മാൻ’ ശൈലി പുറത്തെടുത്തപ്പോൾ, വിരാട് കോഹ്ലി പ്രതിരോധ ഷോട്ടുകൾക്ക് പ്രാധാന്യം നൽകി ബൗളർമാരെ നേരിട്ടു. നായകന്റെ ഭാരമില്ലാതെ പരമ്പരക്കിറങ്ങുന്ന രോഹിത്തും, ടീമിന്റെ പ്രധാന ശക്തിയായ കോഹ്ലിയും പഴയ മികവ് ആവർത്തിച്ചാൽ ഓസ്‌ട്രേലിയൻ മണ്ണിൽ ഇന്ത്യക്ക് ചരിത്രവിജയം നേടാൻ സാധിക്കുമെന്ന പ്രതീക്ഷയിലാണ് ക്രിക്കറ്റ് ലോകം.
ഓസ്‌ട്രേലിയൻ പിച്ചുകളിൽ മികച്ച റെക്കോഡാണ് ഇരുവർക്കുമുള്ളത്. കോഹ്ലി ഓസ്‌ട്രേലിയയിൽ 29 ഏകദിനങ്ങളിൽ നിന്ന് 51.03 ശരാശരിയിൽ 1327 റൺസ് നേടിയിട്ടുണ്ട്, ഇതിൽ അഞ്ച് സെഞ്ചുറിയും ആറ് അർധസെഞ്ചുറിയും ഉൾപ്പെടുന്നു. രോഹിത് ശർമ്മയാകട്ടെ 30 ഇന്നിങ്സുകളിൽ നിന്ന് 53.12 എന്ന മികച്ച ശരാശരിയിൽ അഞ്ച് സെഞ്ചുറിയും നാല് അർധസെഞ്ചുറിയും നേടിയിട്ടുണ്ട്. ഈ കണക്കുകൾ തന്നെ വരാനിരിക്കുന്ന പരമ്പരയിൽ ഇരുവരുടെയും പ്രാധാന്യം എത്രത്തോളമെന്ന് വ്യക്തമാക്കുന്നു. ഇരുവരുടെയും ഇപ്പോഴത്തെ ഫോം നിലവാരം ഇന്ത്യക്ക് കിരീടം നേടാനുള്ള സാധ്യത വർദ്ധിപ്പിക്കുന്നു.
ഈ പ്രകടനങ്ങളുടെ പശ്ചാത്തലത്തിൽ, 2027 ഏകദിന ലോകകപ്പിൽ പോലും രോഹിത്തിനും കോഹ്ലിക്കും കളിക്കാൻ കഴിയുമെന്ന അഭിപ്രായം പരിശീലകൻ ഗൗതം ഗംഭീർ പങ്കുവെച്ചതായി റിപ്പോർട്ടുകൾ സൂചിപ്പിക്കുന്നുണ്ട്. അനുഭവസമ്പന്നരായ ഈ താരങ്ങളുടെ കഴിവും മത്സരങ്ങൾ ജയിപ്പിക്കാനുള്ള പ്രാപ്തിയും ടീമിന് അനിവാര്യമാണെന്നാണ് അദ്ദേഹത്തിൻ്റെ വിലയിരുത്തൽ. വിരമിക്കൽ അഭ്യൂഹങ്ങളെ തള്ളിക്കളഞ്ഞ് പരിശീലനത്തിൽ മികവ് തെളിയിച്ച ഈ യുവതുർക്കികളോടോപ്പം സീനിയർ താരങ്ങൾ കൈകോർക്കുമ്പോൾ ഓസ്‌ട്രേലിയൻ പരമ്പര ഇന്ത്യക്ക് സ്വന്തമാക്കാൻ കഴിയുമെന്ന ആത്മവിശ്വാസം ടീം ഇന്ത്യക്കുണ്ട്.
