യുഎസിലേക്കുള്ള കൊക്കെയ്ൻ ഉൾപ്പെടെയുള്ള ലഹരിമരുന്നുകളുടെ ഒഴുക്ക് തടയുന്നതിൽ കൊളംബിയൻ പ്രസിഡന്റ് ഗുസ്താവോ പെട്രോ പരാജയപ്പെട്ടു എന്ന് ആരോപിച്ച് അമേരിക്ക ഉപരോധം ഏർപ്പെടുത്തി. പ്രസിഡന്റ് ഡൊണാൾഡ് ട്രംപ് ഭരണകൂടമാണ് പെട്രോയ്ക്കെതിരെ ശക്തമായ നടപടിയുമായി മുന്നോട്ട് വന്നിരിക്കുന്നത്. കൊളംബിയൻ പ്രസിഡന്റിനുപുറമെ അദ്ദേഹത്തിന്റെ ഭാര്യക്കും മകനും കൊളംബിയൻ ആഭ്യന്തര മന്ത്രിക്കുമെതിരെയും യുഎസ് ട്രഷറി വകുപ്പ് ഉപരോധം ഏർപ്പെടുത്തി. ലഹരിമരുന്ന് വ്യാപാരവുമായി ബന്ധമുള്ളവർക്കെതിരെ ഏർപ്പെടുത്തുന്ന നിയമപ്രകാരമാണ് ഈ നടപടി.
കൊളംബിയയിൽ പെട്രോ അധികാരത്തിൽ വന്നശേഷം കൊക്കെയ്ൻ ഉൽപ്പാദനം സമീപ ദശാബ്ദങ്ങളിലെ ഏറ്റവും ഉയർന്ന നിരക്കിലേക്ക് കുതിച്ചുയർന്നു എന്നാണ് അമേരിക്കയുടെ പ്രധാന ആരോപണം. ഇത് അമേരിക്കൻ പൗരന്മാരെ വിഷലിപ്തമാക്കുകയും മരണത്തിന് കാരണമാവുകയും ചെയ്യുന്നതായി യുഎസ് ട്രഷറി സെക്രട്ടറി പ്രസ്താവനയിൽ പറഞ്ഞു. ലഹരിമരുന്ന് കടത്ത് സംഘങ്ങളെ വളരാൻ അനുവദിക്കുകയും ഈ പ്രവർത്തനം തടയാൻ പെട്രോ വിസമ്മതിക്കുകയും ചെയ്തുവെന്നും അദ്ദേഹം കൂട്ടിച്ചേർത്തു.
അമേരിക്കയുടെ ഈ നീക്കം ഇരു രാജ്യങ്ങളും തമ്മിലുള്ള ബന്ധത്തിൽ വലിയ ഉലച്ചിലുണ്ടാക്കിയിട്ടുണ്ട്. റഷ്യ, വെനസ്വേല, ഉത്തര കൊറിയ തുടങ്ങിയ രാജ്യങ്ങളുടെ തലവന്മാർക്ക് ഏർപ്പെടുത്തിയതിന് സമാനമായ ഉപരോധമാണ് നിലവിലുള്ള ഒരു ഭരണാധികാരിക്ക് നേരെ യുഎസ് സ്വീകരിച്ചിട്ടുള്ളത്. ഈ നീക്കത്തെ കൊളംബിയൻ പ്രസിഡന്റ് ഗുസ്താവോ പെട്രോ ശക്തമായി എതിർക്കുകയും യുഎസ് ട്രഷറി പറയുന്നത് കളവാണെന്ന് പ്രസ്താവിക്കുകയും ചെയ്തു.
ലഹരിമരുന്ന് വ്യാപാരവുമായി ബന്ധമുണ്ടെന്ന് ആരോപിച്ച് യുഎസ് ഭരണകൂടം അടുത്തിടെ കൊളംബിയയ്ക്ക് നൽകി വന്നിരുന്ന ധനസഹായങ്ങളും സബ്സിഡികളും നിർത്തലാക്കിയിരുന്നു. ഇത് ഇരു രാജ്യങ്ങളും തമ്മിലുള്ള നയതന്ത്രപരമായ ബന്ധം വഷളാക്കി. പുതിയ ഉപരോധം വന്നതോടെ, അമേരിക്കൻ ഐക്യനാടുകളിലുള്ള പെട്രോയുടെ ഏതെങ്കിലും ആസ്തികൾ മരവിപ്പിക്കാൻ സാധ്യതയുണ്ട്. കൂടാതെ അമേരിക്കൻ പൗരന്മാർക്ക് ഉപരോധം ഏർപ്പെടുത്തിയവരുമായി ബിസിനസ് ഇടപാടുകൾ നടത്തുന്നതിനും വിലക്കുണ്ടാകും.
