തിരുവനന്തപുരത്തുനിന്ന് ഡൽഹിയിലേക്ക് പുറപ്പെട്ട എയർ ഇന്ത്യ വിമാനം ചെന്നൈയിൽ അടിയന്തരമായി ഇറക്കിയ സംഭവത്തിൽ വിശദീകരണവുമായി എയർ ഇന്ത്യ. വിമാനത്തിന്റെ റൺവേയിൽ മറ്റൊരു വിമാനം ഉണ്ടായിരുന്നില്ലെന്നും, സംഭവിച്ചത് ‘ഗോ എറൗണ്ട്’ എന്ന നടപടിക്രമം മാത്രമാണെന്നും എയർ ഇന്ത്യ വ്യക്തമാക്കി. റഡാർ സംവിധാനത്തിലുണ്ടായ സാങ്കേതിക തകരാറുകൾ കാരണമാണ് വിമാനം ചെന്നൈയിലേക്ക് വഴിതിരിച്ചുവിട്ടതെന്നും, ഈ നടപടി മുൻകരുതലിന്റെ ഭാഗമായിരുന്നെന്നും എയർ ഇന്ത്യ പറഞ്ഞു. യാത്രക്കാരുടെ സുരക്ഷയ്ക്ക് മുൻഗണന നൽകുന്നതിനാലാണ് വിമാനം ചെന്നൈയിൽ ഇറക്കാൻ തീരുമാനിച്ചതെന്ന് എയർലൈൻ പ്രസ്താവനയിൽ അറിയിച്ചു.
വിമാനത്തിലുണ്ടായിരുന്ന കോൺഗ്രസ് എംപി കെ.സി. വേണുഗോപാൽ ഉൾപ്പെടെയുള്ളവർ ഉന്നയിച്ച ആരോപണങ്ങൾക്കാണ് എയർ ഇന്ത്യ മറുപടി നൽകിയത്. റൺവേയിൽ മറ്റൊരു വിമാനം ഉണ്ടായിരുന്നത് കൊണ്ടാണ് ആദ്യ ലാൻഡിംഗ് ശ്രമം ഉപേക്ഷിച്ചതെന്ന് എംപിമാർ ആരോപിച്ചിരുന്നു. എന്നാൽ എയർ ട്രാഫിക് കൺട്രോൾ (എടിസി) നൽകിയ നിർദ്ദേശപ്രകാരമാണ് ‘ഗോ എറൗണ്ട്’ നടപടി സ്വീകരിച്ചതെന്ന് എയർ ഇന്ത്യ വ്യക്തമാക്കി. ചെന്നൈ എടിസി റൺവേയിൽ എന്തെങ്കിലും അവശിഷ്ടങ്ങൾ ഉണ്ടോയെന്ന് പരിശോധിക്കാൻ ആവശ്യപ്പെട്ടതിനെ തുടർന്നാണ് ലാൻഡിംഗ് ഒഴിവാക്കിയതെന്നും, പിന്നീട് റൺവേ സുരക്ഷിതമാണെന്ന് ഉറപ്പുവരുത്തിയതിന് ശേഷം വിമാനം സുരക്ഷിതമായി ഇറക്കിയെന്നും എയർ ഇന്ത്യ വിശദീകരിക്കുന്നു.
കേരളത്തിൽ നിന്നുള്ള അഞ്ച് എംപിമാർ ഉൾപ്പെടെ 160 യാത്രക്കാരാണ് അപകടത്തിൽ നിന്ന് രക്ഷപ്പെട്ടത്. കെ.സി. വേണുഗോപാൽ, കൊടിക്കുന്നിൽ സുരേഷ്, അടൂർ പ്രകാശ്, കെ. രാധാകൃഷ്ണൻ, കൂടാതെ തമിഴ്‌നാട്ടിൽ നിന്നുള്ള റോബർട്ട് ബ്രൂസ് എന്നിവരായിരുന്നു വിമാനത്തിലുണ്ടായിരുന്ന എംപിമാർ. വിമാനത്തിലുണ്ടായിരുന്ന യാത്രക്കാരെ മറ്റൊരു വിമാനത്തിൽ ഡൽഹിയിലേക്ക് എത്തിച്ചതായി എയർ ഇന്ത്യ അറിയിച്ചു. സാങ്കേതിക പ്രശ്‌നങ്ങൾ ഉണ്ടായ വിമാനത്തിൽ പിന്നീട് എഞ്ചിനീയർമാർ വിശദമായ പരിശോധന നടത്തി.
യാത്രക്കിടെ ഉണ്ടായ ശക്തമായ കുലുക്കവും, പൈലറ്റ് അറിയിച്ച സാങ്കേതിക തകരാറുകളും യാത്രക്കാരിൽ പരിഭ്രാന്തി സൃഷ്ടിച്ചു. ലാൻഡിംഗ് ശ്രമം ഉപേക്ഷിച്ച് വിമാനം വീണ്ടും ഉയർന്നപ്പോൾ യാത്രക്കാർ ഭയന്നുപോയെന്നും, പൈലറ്റിൻ്റെ അവസരോചിതമായ ഇടപെടൽ മൂലമാണ് വലിയൊരു ദുരന്തം ഒഴിവായതെന്നും എംപിമാർ പ്രതികരിച്ചു. അതേസമയം, സുരക്ഷാ വീഴ്ച സംഭവിച്ചിട്ടില്ലെന്നും, പൈലറ്റുമാർ ഇത്തരം സാഹചര്യങ്ങൾ നേരിടാൻ പരിശീലനം ലഭിച്ചവരാണെന്നും എയർ ഇന്ത്യ അറിയിച്ചു. സംഭവത്തിൽ ഡിജിസിഎ അന്വേഷണം പ്രഖ്യാപിച്ചിട്ടുണ്ട്.
