ചുഴലിക്കാറ്റ് ‘മോൻത’യുടെ ഭീഷണിയിൽ ആന്ധ്രാപ്രദേശ് സംസ്ഥാനം അതീവ ജാഗ്രതയിലാണ്. ബംഗാൾ ഉൾക്കടലിൽ രൂപം കൊണ്ട അതിതീവ്ര ന്യൂനമർദ്ദം ശക്തി പ്രാപിച്ച് ഒക്ടോബർ 28-ന് വൈകുന്നേരമോ രാത്രിയോയോടെ ആന്ധ്രാ തീരത്ത്, മച്ചിലിപ്പട്ടണത്തിനും കാളിംഗപട്ടണത്തിനും ഇടയിൽ കാക്കിനാഡക്ക് സമീപം കരയിൽ പ്രവേശിക്കാൻ സാധ്യതയുണ്ടെന്നാണ് ഇന്ത്യൻ കാലാവസ്ഥാ വകുപ്പ് (IMD) മുന്നറിയിപ്പ് നൽകിയിരിക്കുന്നത്. ചുഴലിക്കാറ്റ് കരയിലേക്ക് പ്രവേശിക്കുമ്പോൾ മണിക്കൂറിൽ 90–100 കിലോമീറ്റർ വരെ വേഗതയിൽ കാറ്റു വീശാനും 110 കിലോമീറ്റർ വരെ കാറ്റ് ശക്തിപ്പെടാനും സാധ്യതയുണ്ട്. ഇതിന്റെ പശ്ചാത്തലത്തിൽ, ആന്ധ്രയിലെ തീരദേശ ജില്ലകളിലും, സമീപ പ്രദേശങ്ങളിലും കനത്തതോ അതിശക്തമായതോ ആയ മഴയ്ക്ക് സാധ്യതയുണ്ട്.
‘മോൻത’ ചുഴലിക്കാറ്റിന്റെ പശ്ചാത്തലത്തിൽ സംസ്ഥാനത്ത് മുൻകരുതൽ നടപടികൾ ഊർജിതമാക്കി. കാക്കിനാഡ, ഈസ്റ്റ് ഗോദാവരി, കൊണസീമ, പശ്ചിമ ഗോദാവരി തുടങ്ങി പല ജില്ലകളിലും വിദ്യാഭ്യാസ സ്ഥാപനങ്ങൾക്ക് അവധി പ്രഖ്യാപിച്ചു. കൂടാതെ, തീരപ്രദേശങ്ങളിൽ താമസിക്കുന്നവരെയും താഴ്ന്ന പ്രദേശങ്ങളിലുള്ളവരെയും സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിക്കുന്നതിനായി ദുരിതാശ്വാസ ക്യാമ്പുകൾ തുറന്നിട്ടുണ്ട്. ദുരന്തനിവാരണ സേനാംഗങ്ങളെയും മറ്റ് സർക്കാർ ഉദ്യോഗസ്ഥരെയും ജാഗ്രതാ നിർദ്ദേശങ്ങൾ നൽകി സജ്ജരാക്കിയിട്ടുണ്ട്. തീരദേശങ്ങളിൽ മത്സ്യബന്ധനം പൂർണ്ണമായും നിരോധിച്ചു.
ചുഴലിക്കാറ്റ് കനത്ത നാശനഷ്ടങ്ങൾക്ക് ഇടയാക്കാൻ സാധ്യതയുള്ളതിനാൽ, ആന്ധ്രാപ്രദേശിന്റെ വിവിധ ജില്ലകളിൽ കാലാവസ്ഥാ വകുപ്പ് റെഡ് അലർട്ട് പ്രഖ്യാപിച്ചു. കനത്ത മഴയിലും കാറ്റിലും വൈദ്യുതി ബന്ധം, വാർത്താവിനിമയ ശൃംഖല, കുടിവെള്ള വിതരണം തുടങ്ങിയ അടിയന്തിര സേവനങ്ങളെല്ലാം തടസ്സപ്പെടാൻ സാധ്യതയുണ്ടെന്നാണ് മുന്നറിയിപ്പ്. 2014-ലെ ഹുദ്ഹുദ് ചുഴലിക്കാറ്റ് ഉണ്ടാക്കിയ വൻ നാശനഷ്ടങ്ങൾ മനസ്സിൽ വെച്ച്, ജനങ്ങൾ ഭക്ഷ്യവസ്തുക്കളും അത്യാവശ്യ സാധനങ്ങളും സംഭരിക്കാൻ തിടുക്കം കാണിക്കുന്നു.
മുഖ്യമന്ത്രി എൻ. ചന്ദ്രബാബു നായിഡുവിന്റെ നേതൃത്വത്തിൽ സംസ്ഥാനത്തെ മുഴുവൻ ഭരണ സംവിധാനങ്ങളും ഹൈ അലേർട്ടിലാണ്. ഗ്രാമതലം മുതൽ സംസ്ഥാന തലം വരെയുള്ള എല്ലാ ഉദ്യോഗസ്ഥരോടും വകുപ്പുകളുമായി ഏകോപിച്ച് പ്രവർത്തിക്കാൻ നിർദ്ദേശം നൽകിയിട്ടുണ്ട്. ദുരിതാശ്വാസ പ്രവർത്തനങ്ങൾക്കായി എല്ലാ തയ്യാറെടുപ്പുകളും പൂർത്തിയാക്കിയിട്ടുണ്ടെന്നും, ജനങ്ങൾ പരിഭ്രാന്തരാകാതെ ഔദ്യോഗിക അറിയിപ്പുകൾ മാത്രം വിശ്വസിക്കണമെന്നും അധികൃതർ അഭ്യർത്ഥിച്ചു. ‘മോൻത’ ചുഴലിക്കാറ്റിന്റെ പ്രഭാവം ഒക്ടോബർ 27 മുതൽ 29 വരെ ശക്തമായി അനുഭവപ്പെടും.
