രാജ്യതലസ്ഥാനമായ ഡൽഹിയിൽ ചെങ്കോട്ടയ്ക്ക് സമീപം നടന്ന ശക്തമായ കാർ സ്ഫോടനത്തിന്റെ പശ്ചാത്തലത്തിൽ കേരളത്തിലും സുരക്ഷാ ക്രമീകരണങ്ങൾ ശക്തമാക്കാൻ സംസ്ഥാന പോലീസ് മേധാവി (ഡിജിപി) നിർദ്ദേശം നൽകി. സംഭവം ഭീകരാക്രമണമാണോ എന്ന് സംശയിക്കുന്ന സാഹചര്യത്തിൽ, മുൻകരുതലിൻ്റെ ഭാഗമായാണ് സംസ്ഥാനത്ത് ഉടനീളം ജാഗ്രതാ നിർദേശം നൽകിയിരിക്കുന്നത്. ജില്ലാ പോലീസ് മേധാവിമാർക്കാണ് സുരക്ഷ ശക്തമാക്കാൻ സംസ്ഥാന പോലീസ് മേധാവി റവാഡാ ആസാദ് ചന്ദ്രശേഖർ നിർദ്ദേശം നൽകിയിട്ടുള്ളത്.
ജനത്തിരക്കേറിയ എല്ലാ പ്രധാന കേന്ദ്രങ്ങളിലും നിരീക്ഷണവും പട്രോളിംഗും കർശനമാക്കാൻ ഡിജിപി ഉത്തരവിട്ടിട്ടുണ്ട്. റെയിൽവേ സ്റ്റേഷനുകൾ, ബസ് സ്റ്റാൻഡുകൾ, ആരാധനാലയങ്ങൾ, ഷോപ്പിംഗ് മാളുകൾ തുടങ്ങിയ പൊതുഇടങ്ങളിൽ പോലീസ് പരിശോധനകൾ ഊർജ്ജിതമാക്കും. സംശയാസ്പദമായ സാഹചര്യങ്ങൾ ഉണ്ടാകുന്നുണ്ടോയെന്ന് ഉറപ്പുവരുത്താൻ പോലീസ് ഉദ്യോഗസ്ഥരോട് ആവശ്യപ്പെട്ടിട്ടുണ്ട്. സംശയകരമായ സാഹചര്യങ്ങൾ കണ്ടാൽ ഉടൻ തന്നെ നടപടിയെടുക്കാനുള്ള നിർദ്ദേശങ്ങളും നൽകിയിട്ടുണ്ട്.
സുരക്ഷാ മുന്നറിയിപ്പിന്റെ ഭാഗമായി പൊതുജനങ്ങൾ അതീവ ജാഗ്രത പാലിക്കണമെന്ന് സംസ്ഥാന പോലീസ് മേധാവി അറിയിച്ചു. പൊതുസ്ഥലങ്ങളിൽ ഉപേക്ഷിക്കപ്പെട്ട നിലയിലോ സംശയാസ്പദമായ രീതിയിലോ കാണുന്ന വസ്തുക്കളോ സാധനങ്ങളോ ശ്രദ്ധയിൽപ്പെട്ടാൽ ഉടൻ തന്നെ പോലീസിനെ വിവരമറിയിക്കണം. ഇത്തരം സന്ദർഭങ്ങളിൽ പരിഭ്രാന്തരാകാതെ, പോലീസിൻ്റെ നിർദ്ദേശങ്ങൾ പാലിക്കണമെന്നും 112 എന്ന നമ്പറിൽ ബന്ധപ്പെട്ട് വിവരം കൈമാറണമെന്നും അദ്ദേഹം ജനങ്ങളോട് ആവശ്യപ്പെട്ടു.
ഡൽഹി സ്ഫോടനത്തെ തുടർന്ന് യുഎപിഎ (UAPA), സ്ഫോടകവസ്തു നിയമം (Explosives Act) എന്നീ വകുപ്പുകൾ പ്രകാരം ഡൽഹി പോലീസ് കേസെടുത്തിട്ടുണ്ട്. സ്ഫോടനത്തിന് ഉപയോഗിച്ച കാറിൻ്റെ ഉടമസ്ഥാവകാശത്തെക്കുറിച്ചുള്ള ദുരൂഹതകൾ ഭീകരാക്രമണ സാധ്യതയിലേക്ക് വിരൽചൂണ്ടുന്ന സാഹചര്യത്തിലാണ് കേരളത്തിലും ജാഗ്രത വർധിപ്പിച്ചത്. രാജ്യത്തിൻ്റെ സുരക്ഷയ്ക്ക് വെല്ലുവിളി ഉയർത്തുന്ന ശക്തികൾക്കെതിരെ ഒറ്റക്കെട്ടായി നിൽക്കണമെന്ന് മുഖ്യമന്ത്രി പിണറായി വിജയനും പ്രതികരിച്ചിരുന്നു.
