മാസങ്ങൾ നീണ്ട ആകാംഷയ്ക്ക് വിരാമമിട്ട് 25 കോടി രൂപ ഒന്നാം സമ്മാനമുള്ള ഓണം ബമ്പർ ലോട്ടറി നറുക്കെടുപ്പ് ഇന്ന് (ശനിയാഴ്ച) ഉച്ചയ്ക്ക് രണ്ട് മണിക്ക് നടക്കും. സെപ്റ്റംബർ 27-ന് നടക്കേണ്ടിയിരുന്ന നറുക്കെടുപ്പ്, കനത്ത മഴയും ടിക്കറ്റ് വിൽപ്പനയുമായി ബന്ധപ്പെട്ട വിഷയങ്ങളും കാരണം ഒക്ടോബർ നാലിലേക്ക് മാറ്റുകയായിരുന്നു. സംസ്ഥാന ഭാഗ്യക്കുറി വകുപ്പിന്റെ ചരിത്രത്തിലെ ഏറ്റവും ഉയർന്ന സമ്മാനത്തുകയാണ് ഇത്തവണ ഓണം ബമ്പറിലൂടെ ഭാഗ്യവാന് ലഭിക്കുക. ഈ വർഷം 75 ലക്ഷം ടിക്കറ്റുകളാണ് അച്ചടിച്ച് വിറ്റഴിച്ചത്.
ഓണം ബമ്പർ ഫലം വേഗത്തിൽ അറിയാൻ ലളിതമായ വഴികൾ ലഭ്യമാണ്. നറുക്കെടുപ്പ് ഉച്ചയ്ക്ക് 2 മണിക്ക് ആരംഭിക്കുമെങ്കിലും, പ്രധാന സമ്മാനമായ 25 കോടിയുടെ ഒന്നാം സമ്മാനത്തിന്റെ ഫലം ഏകദേശം 3 മണിയോടെയോ അതിനു ശേഷമോ പുറത്തുവരും. ഏറ്റവും വേഗത്തിൽ ഫലം അറിയാനുള്ള വഴി കേരള സംസ്ഥാന ഭാഗ്യക്കുറി വകുപ്പിന്റെ ഔദ്യോഗിക വെബ്സൈറ്റുകളാണ്. https://statelottery.kerala.gov.in എന്ന വെബ്സൈറ്റിലും, മറ്റ് ഔദ്യോഗിക വെബ്സൈറ്റുകളിലും പി.ഡി.എഫ് രൂപത്തിൽ ഫലം പ്രസിദ്ധീകരിക്കും.
ഔദ്യോഗിക വെബ്സൈറ്റുകൾക്ക് പുറമെ, നിരവധി പ്രമുഖ വാർത്താ മാധ്യമങ്ങളുടെ വെബ്സൈറ്റുകളിലും മൊബൈൽ ആപ്ലിക്കേഷനുകളിലും തത്സമയം നറുക്കെടുപ്പ് വിവരങ്ങൾ അപ്ഡേറ്റ് ചെയ്യും. ഇവിടെ നിങ്ങളുടെ ടിക്കറ്റ് നമ്പറുകൾ പരിശോധിച്ച് ഒന്നാം സമ്മാനം അടിച്ചു എന്ന് ഉറപ്പിക്കാൻ സാധിക്കും. ഒരേ സമയം നിരവധി ആളുകൾ വെബ്സൈറ്റുകളിൽ പ്രവേശിക്കാൻ ശ്രമിക്കുന്നത് കാരണം സെർവർ തടസ്സങ്ങൾ ഉണ്ടാകാൻ സാധ്യതയുള്ളതിനാൽ, ഒന്നിലധികം മാർഗ്ഗങ്ങളിലൂടെ ഫലം പരിശോധിക്കുന്നത് വേഗത്തിൽ വിവരങ്ങൾ ലഭിക്കാൻ സഹായിക്കും.
25 കോടി രൂപയാണ് ഒന്നാം സമ്മാനം എങ്കിലും ഏജന്റ് കമ്മീഷനും (10%), ആദായനികുതിയും (30%) കിഴിച്ചുള്ള തുകയേ വിജയിയുടെ കൈയ്യിൽ എത്തുകയുള്ളൂ. സമ്മാനം അടിച്ച വ്യക്തി ആദ്യം ചെയ്യേണ്ടത്, ടിക്കറ്റ് സുരക്ഷിതമായി സൂക്ഷിക്കുക എന്നതാണ്. 5000 രൂപയ്ക്ക് മുകളിലുള്ള സമ്മാനങ്ങൾ ലഭിക്കുന്നവർ, തിരിച്ചറിയൽ രേഖകൾ സഹിതം ബാങ്കിനെയോ അല്ലെങ്കിൽ ഭാഗ്യക്കുറി ഓഫീസിനെയോ സമീപിക്കുകയും, അവർ നിർദ്ദേശിക്കുന്ന രീതിയിൽ അപേക്ഷ സമർപ്പിക്കുകയും വേണം. ഭാഗ്യവാനെ അറിയാൻ ഇനി ഏതാനും മണിക്കൂറുകൾ മാത്രം.
