ബംഗാൾ ഉൾക്കടലിൽ രൂപം കൊണ്ട മോൻത ചുഴലിക്കാറ്റ് അതിതീവ്ര ചുഴലിക്കാറ്റായി മാറി ആന്ധ്രാപ്രദേശ് തീരം കടന്നു. മണിക്കൂറിൽ 100 കിലോമീറ്റർ വരെ വേഗതയിൽ കാറ്റും കനത്ത മഴയും തീരദേശങ്ങളിൽ നാശം വിതച്ചു. ആന്ധ്രാപ്രദേശിലെ മച്ചിലിപട്ടണത്തിനും കലിംഗപട്ടണത്തിനും ഇടയിലുള്ള കാക്കിനാടയ്ക്ക് സമീപമാണ് ചുഴലിക്കാറ്റ് തീരം തൊട്ടത്. ഈ സീസണിലെ ആദ്യത്തെ വലിയ ചുഴലിക്കാറ്റാണ് മോൻത. ചുഴലിക്കാറ്റിനെ തുടർന്നുണ്ടായ ശക്തമായ കാറ്റിൽ മരം വീണ് ഒരു സ്ത്രീ മരിക്കുകയും ചെയ്തിട്ടുണ്ട്.
തീരം തൊട്ടതിന് പിന്നാലെ ആന്ധ്രാപ്രദേശിലെ തീരദേശ ജില്ലകളിൽ വ്യാപക നാശനഷ്ടങ്ങളാണ് റിപ്പോർട്ട് ചെയ്തിരിക്കുന്നത്. റോഡുകളിൽ മരങ്ങൾ കടപുഴകി വീണതിനെ തുടർന്ന് ഗതാഗതം പൂർണ്ണമായും തടസ്സപ്പെട്ടു. നിരവധി സ്ഥലങ്ങളിൽ വൈദ്യുതി ലൈനുകൾ പൊട്ടി വീഴുകയും വൈദ്യുതി ബന്ധം തകരാറിലാവുകയും ചെയ്തു. ചുഴലിക്കാറ്റിന്റെ ആഘാതത്തിൽ കടൽക്ഷോഭം രൂക്ഷമാകുകയും തിരമാലകൾ 10 അടി വരെ ഉയരത്തിൽ ആഞ്ഞടിക്കുകയും ചെയ്തു. താഴ്ന്ന പ്രദേശങ്ങളിലെ വീടുകളിൽ വെള്ളം കയറുകയും ജനജീവിതം സ്തംഭിക്കുകയും ചെയ്തു.
മോൻത ചുഴലിക്കാറ്റിന്റെ അപകടസാധ്യത കണക്കിലെടുത്ത് ആയിരക്കണക്കിന് ആളുകളെ സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചു. ആന്ധ്രാപ്രദേശിലും ഒഡീഷയിലുമായി 12,000-ൽ അധികം ആളുകളാണ് ദുരിതാശ്വാസ ക്യാമ്പുകളിൽ അഭയം തേടിയത്. ‘പൂജ്യം മരണസംഖ്യ’ എന്ന ലക്ഷ്യത്തോടെ 11,000-ത്തോളം അപകടസാധ്യതയുള്ളവരെ അധികൃതർ സുരക്ഷിത സ്ഥാനങ്ങളിലേക്ക് മാറ്റി. രക്ഷാപ്രവർത്തനങ്ങൾക്കായി ദേശീയ ദുരന്ത നിവാരണ സേനയുടെ (NDRF) ഉൾപ്പെടെയുള്ള 158 അടിയന്തര ടീമുകളെയാണ് വിന്യസിച്ചിട്ടുള്ളത്.
ആന്ധ്രയ്ക്ക് പുറമെ ഒഡീഷയിലും മോൻതയുടെ ശക്തി അനുഭവപ്പെട്ടു. ഗഞ്ചം, ഗജപതി ജില്ലകളിൽ മണിക്കൂറിൽ 100 കിലോമീറ്റർ വരെ വേഗതയിൽ കാറ്റും കനത്ത മഴയും ലഭിച്ചു. ചുഴലിക്കാറ്റിനെ തുടർന്ന് ട്രെയിൻ, വിമാന സർവീസുകൾ റദ്ദാക്കുകയോ വഴിതിരിച്ചുവിടുകയോ ചെയ്തിട്ടുണ്ട്. മോൻത ചുഴലിക്കാറ്റിന്റെ തീവ്രത നിലവിൽ കുറഞ്ഞെങ്കിലും മഴ തുടരുന്നതിനാൽ ജനങ്ങൾ ജാഗ്രത തുടരണമെന്ന് അധികൃതർ നിർദ്ദേശം നൽകിയിട്ടുണ്ട്.
