തെക്കുകിഴക്കൻ ബംഗാൾ ഉൾക്കടലിൽ രൂപം കൊണ്ട മോൻത ചുഴലിക്കാറ്റ് അതിശക്തിയായി ഇന്ത്യയുടെ കിഴക്കൻ തീരത്തേക്ക് അടുക്കുകയാണ്. ഇന്ന് (ചൊവ്വാഴ്ച) വൈകുന്നേരത്തോടെ ചുഴലിക്കാറ്റ് ആന്ധ്രാപ്രദേശിലെ കാക്കിനടക്ക് സമീപം കര തൊടുമെന്നാണ് കേന്ദ്ര കാലാവസ്ഥാ വകുപ്പിന്റെ പ്രവചനം. ഈ സമയം കാറ്റിന്റെ വേഗത മണിക്കൂറിൽ 110 കിലോമീറ്റർ വരെയാകാൻ സാധ്യതയുണ്ട്. കനത്ത മഴക്കും ശക്തമായ കാറ്റിനും സാധ്യതയുള്ളതിനാൽ ആന്ധ്രാപ്രദേശ്, ഒഡിഷ, തമിഴ്നാട് എന്നീ സംസ്ഥാനങ്ങളിൽ അതീവ ജാഗ്രത നിർദേശം നൽകിയിട്ടുണ്ട്.
ചുഴലിക്കാറ്റിന്റെ തീവ്രത കണക്കിലെടുത്ത്, സുരക്ഷാ നടപടികളുടെ ഭാഗമായി കനത്ത മഴ പ്രതീക്ഷിക്കുന്ന തീരദേശ ജില്ലകളിലെ വിദ്യാഭ്യാസ സ്ഥാപനങ്ങൾക്ക് ഇന്നും നാളെയും (ഒക്ടോബർ 28, 29) അവധി പ്രഖ്യാപിച്ചിരിക്കുകയാണ്. അപകടസാധ്യതയുള്ള പ്രദേശങ്ങളിലുള്ളവരെ സുരക്ഷിത സ്ഥാനങ്ങളിലേക്ക് മാറ്റുന്നതിനായി ദുരിതാശ്വാസ ക്യാമ്പുകൾ തുറന്നു. നാശനഷ്ടങ്ങൾ കുറയ്ക്കുന്നതിനായി സംസ്ഥാന സർക്കാരുകളും ദുരന്ത നിവാരണ സേനകളും വിപുലമായ മുന്നൊരുക്കങ്ങൾ നടത്തി വരുന്നു.
മോൻത ചുഴലിക്കാറ്റ് കേരളത്തെ നേരിട്ട് ബാധിക്കില്ലെങ്കിലും, ഇതിന്റെ സ്വാധീനഫലമായി സംസ്ഥാനത്ത് ശക്തമായ മഴ തുടരാൻ സാധ്യതയുണ്ട്. തിരുവനന്തപുരം, കൊല്ലം, ആലപ്പുഴ, എറണാകുളം ഉൾപ്പെടെ ഏഴ് ജില്ലകളിൽ നിലവിൽ മഞ്ഞ അലർട്ട് പ്രഖ്യാപിച്ചിട്ടുണ്ട്. ഇടിമിന്നലോടു കൂടിയ മഴയ്ക്കും ചില ഒറ്റപ്പെട്ട സ്ഥലങ്ങളിൽ ശക്തമായ കാറ്റിനും സാധ്യതയുള്ളതിനാൽ പൊതുജനങ്ങൾ ജാഗ്രത പാലിക്കണമെന്ന് മുന്നറിയിപ്പുണ്ട്.
സുരക്ഷാ മുൻകരുതലിന്റെ ഭാഗമായി കേരള തീരത്തും മത്സ്യബന്ധനത്തിന് ഏർപ്പെടുത്തിയ വിലക്ക് തുടരും. മലയോര, തീരദേശ മേഖലകളിൽ താമസിക്കുന്നവർക്ക് പ്രത്യേക ജാഗ്രതാ നിർദ്ദേശങ്ങൾ നൽകിയിട്ടുണ്ട്. അപകടങ്ങൾ ഒഴിവാക്കുന്നതിനായി അധികൃതരുടെ നിർദ്ദേശങ്ങൾ കർശനമായി പാലിക്കുകയും, അനാവശ്യ യാത്രകൾ ഒഴിവാക്കുകയും ചെയ്യേണ്ടതാണ്.
