റഷ്യൻ പ്രസിഡന്റ് വ്ലാഡിമിർ പുടിൻ, അമേരിക്കൻ പ്രസിഡന്റ് ഡൊണാൾഡ് ട്രംപുമായുള്ള ഉച്ചകോടി മാറ്റിവെച്ചതായി സ്ഥിരീകരിച്ചു. ഹംഗറിയിലെ ബുഡാപെസ്റ്റിൽ നടത്താൻ നിശ്ചയിച്ചിരുന്ന കൂടിക്കാഴ്ചയാണ് മാറ്റിവെച്ചത്. വേണ്ടത്ര മുന്നൊരുക്കങ്ങളില്ലാതെ ഒരു ഉച്ചകോടിയിലേക്ക് പോകുന്നത് ഉചിതമല്ലെന്നും, എന്നാൽ ഭാവിയിൽ ഒരു കൂടിക്കാഴ്ചയ്ക്ക് സാധ്യതയുണ്ടെന്നും പുടിൻ വ്യക്തമാക്കി. മോസ്കോയ്ക്കും വാഷിങ്ടണിനും സഹകരിക്കാൻ കഴിയുന്ന നിരവധി മേഖലകളുണ്ടെന്നും അദ്ദേഹം കൂട്ടിച്ചേർത്തു.
റഷ്യയുടെ ഏറ്റവും വലിയ രണ്ട് എണ്ണക്കമ്പനികൾക്കെതിരെ യുഎസ് പ്രസിഡന്റ് ഡൊണാൾഡ് ട്രംപ് പുതിയ ഉപരോധങ്ങൾ ഏർപ്പെടുത്തിയതിന് പിന്നാലെയാണ് പുടിൻ്റെ പ്രതികരണം. ഈ ഉപരോധങ്ങളെ ‘അനുകൂലമല്ലാത്ത നീക്കം’ എന്നാണ് റഷ്യൻ പ്രസിഡൻ്റ് വിശേഷിപ്പിച്ചത്. അമേരിക്കയുടെ ഈ നടപടി ഇരു രാജ്യങ്ങളും തമ്മിലുള്ള ബന്ധം മെച്ചപ്പെടുത്തുന്നതിന് സഹായകമാകില്ലെന്നും അദ്ദേഹം അഭിപ്രായപ്പെട്ടു. യുക്രെയ്ൻ യുദ്ധം അവസാനിപ്പിക്കാൻ റഷ്യക്കുമേൽ സമ്മർദ്ദം ചെലുത്താനാണ് അമേരിക്ക ഈ നീക്കം നടത്തിയതെന്നാണ് വിലയിരുത്തൽ.
ട്രംപിൻ്റെ ഉപരോധങ്ങൾ റഷ്യൻ സമ്പദ്വ്യവസ്ഥയിൽ കാര്യമായ സ്വാധീനം ചെലുത്തില്ലെന്നും പുടിൻ തറപ്പിച്ചു പറഞ്ഞു. അമേരിക്ക ഉപരോധങ്ങളെ സമ്മർദ്ദം ചെലുത്താനുള്ള ഒരു ഉപാധിയായി ആവർത്തിച്ച് ഉപയോഗിക്കുകയാണ്. എന്നാൽ സ്വയം ബഹുമാനിക്കുന്ന ഒരു രാജ്യവും സമ്മർദ്ദത്തിന് വഴങ്ങി ഒന്നും ചെയ്യില്ല. ഇത്തരം തന്ത്രങ്ങൾ വിജയിക്കില്ലെന്നും റഷ്യൻ പ്രസിഡൻ്റ് മുന്നറിയിപ്പ് നൽകി. യുദ്ധം തുടരുന്നതിനേക്കാൾ നല്ലത് സംഭാഷണമാണെന്ന നിലപാടാണ് തനിക്കുള്ളതെന്നും അദ്ദേഹം കൂട്ടിച്ചേർത്തു.
റഷ്യൻ എണ്ണക്കമ്പനികളായ റോസ്നെഫ്റ്റിനും ലൂക്കോയിലിനുമെതിരെയാണ് യുഎസ് ട്രഷറി ഡിപ്പാർട്ട്മെൻ്റ് ഉപരോധം ഏർപ്പെടുത്തിയത്. ഈ കമ്പനികളുടെ യുഎസ് ആസ്ഥാനമായുള്ള എല്ലാ ആസ്തികളും മരവിപ്പിക്കുകയും അമേരിക്കൻ പൗരന്മാർക്കും സ്ഥാപനങ്ങൾക്കും അവരുമായി ഇടപാടുകൾ നടത്തുന്നത് നിരോധിക്കുകയും ചെയ്യുന്നതാണ് ഈ ഉപരോധങ്ങൾ. അതേസമയം, വാഷിങ്ടണിൻ്റെയോ മറ്റ് രാജ്യങ്ങളുടെയോ സമ്മർദ്ദങ്ങൾക്ക് മുന്നിൽ മോസ്കോ തലകുനിക്കില്ലെന്നും, റഷ്യൻ പ്രദേശങ്ങൾ ലക്ഷ്യം വച്ചുള്ള ഏത് ആക്രമണത്തിനും ഗൗരവമേറിയ മറുപടി ഉണ്ടാകുമെന്നും പുടിൻ മുന്നറിയിപ്പ് നൽകി.
