അമേരിക്കൻ പ്രസിഡന്റ് ഡൊണാൾഡ് ട്രംപ് അടുത്ത വർഷം ഇന്ത്യ സന്ദർശിച്ചേക്കുമെന്ന് സൂചന നൽകിയിരിക്കുന്നു. വൈറ്റ് ഹൗസിൽ മാധ്യമങ്ങളോട് സംസാരിക്കവെയാണ് അദ്ദേഹം ഇക്കാര്യം വെളിപ്പെടുത്തിയത്. പ്രധാനമന്ത്രി നരേന്ദ്ര മോദിയുമായുള്ള ബന്ധം മികച്ച രീതിയിൽ മുന്നോട്ട് പോകുകയാണെന്ന് വ്യക്തമാക്കിയ ട്രംപ്, മോദി ഒരു മഹാനായ വ്യക്തിയും തന്റെ അടുത്ത സുഹൃത്തുമാണെന്നും പ്രശംസിച്ചു. ഇന്ത്യ സന്ദർശിക്കാൻ താൻ ആഗ്രഹിക്കുന്നുണ്ടെന്നും അതിനുള്ള സാധ്യതകൾ ആലോചിച്ച് തീരുമാനിക്കുമെന്നും ട്രംപ് അറിയിച്ചു.
ഇന്ത്യൻ പ്രധാനമന്ത്രി നരേന്ദ്ര മോദിയുമായി തനിക്ക് ഊഷ്മളമായ വ്യക്തിബന്ധമുണ്ട്. അദ്ദേഹം മഹാനായ വ്യക്തിയാണ്, എന്റെ സുഹൃത്താണ്, ഞങ്ങൾ സംസാരിക്കാറുണ്ട്. ഞാൻ ഇന്ത്യയിലേക്ക് വരണമെന്ന് അദ്ദേഹവും ആഗ്രഹിക്കുന്നു. അടുത്ത വർഷം ഇന്ത്യയിലേക്ക് യാത്ര ചെയ്യാൻ പദ്ധതിയുണ്ടോയെന്ന ചോദ്യത്തിന് മറുപടിയായാണ് “അങ്ങനെയാകാം” എന്ന് ട്രംപ് പ്രതികരിച്ചത്. ഇരു രാജ്യങ്ങളും തമ്മിലുള്ള വ്യാപാര ബന്ധം ശക്തിപ്പെടുത്തുന്നതുമായി ബന്ധപ്പെട്ട ചർച്ചകൾ പുരോഗമിക്കുന്നതിനിടയിലാണ് ട്രംപിന്റെ ഈ പ്രതികരണം എന്നത് ശ്രദ്ധേയമാണ്.
റഷ്യൻ എണ്ണ ഇറക്കുമതി സംബന്ധിച്ച് ഇന്ത്യ സ്വീകരിച്ച നിലപാടുകൾ ട്രംപ് പരാമർശിച്ചു. റഷ്യയിൽ നിന്നുള്ള എണ്ണ വാങ്ങൽ മോദി വലിയ തോതിൽ നിർത്തിയെന്നും അദ്ദേഹം ചൂണ്ടിക്കാട്ടി. ഇരു രാജ്യങ്ങളും തമ്മിൽ നിലനിൽക്കുന്ന ചില താരിഫ് (തീരുവ) വിഷയങ്ങളെക്കുറിച്ചും ട്രംപ് സംസാരിച്ചു. ഈ പ്രശ്നങ്ങൾ പരിഹരിക്കപ്പെടുമെന്നും അദ്ദേഹം സൂചന നൽകി. വ്യാപാര കരാർ സംബന്ധിച്ച ചർച്ചകൾക്കായി ഇരുരാജ്യങ്ങളുടെയും പ്രതിനിധികൾ നിലവിൽ ചർച്ചകൾ നടത്തുന്നുണ്ട്.
അമേരിക്ക-ഇന്ത്യ ഉഭയകക്ഷി ബന്ധത്തിൽ ട്രംപിന്റെ പ്രസ്താവന നിർണായകമാണ്. പ്രധാനമന്ത്രി മോദിയുമായുള്ള സൗഹൃദം ആവർത്തിച്ച് ഉറപ്പിച്ചതിലൂടെ, ഇരു രാജ്യങ്ങളും തമ്മിലുള്ള തന്ത്രപരമായ ബന്ധം കൂടുതൽ ദൃഢമാക്കാനുള്ള സാധ്യതയാണ് ട്രംപ് തുറന്നുകാട്ടുന്നത്. അടുത്ത വർഷം ട്രംപിന്റെ ഇന്ത്യ സന്ദർശനം ഇരുരാജ്യങ്ങൾക്കുമിടയിൽ പുതിയ വ്യാപാര, പ്രതിരോധ കരാറുകൾക്ക് വഴി തുറക്കുമെന്നാണ് പ്രതീക്ഷിക്കുന്നത്.
