തിരുവനന്തപുരം ടെക്നോപാർക്കിൽ മെറിഡിയൻ ടെക് പാർക്കിന്റെ ഇരട്ട ടവർ ക്യാമ്പസ് 850 കോടി രൂപയുടെ നിക്ഷേപവുമായി യാഥാർത്ഥ്യമാകാൻ ഒരുങ്ങുകയാണ്. യുഎഇ ആസ്ഥാനമായുള്ള ബിസിനസ് കമ്പനിയായ അൽ മർസൂഖി ഹോൾഡിങ്സ് എഫ്.ഇസഡ്.സി. (Al Marzooqi Holdings FZC) ആണ് ഈ നേരിട്ടുള്ള വിദേശ നിക്ഷേപം (FDI) കൊണ്ടുവരുന്നത്. ടെക്നോപാർക്ക് ഫേസ് 3-യിലാണ് ലോകോത്തര നിലവാരത്തിലുള്ള ഈ ഐ.ടി./ഐ.ടി. അധിഷ്ഠിത പദ്ധതിക്കായി 3.5 ഏക്കർ സ്ഥലം ഉപയോഗിക്കുന്നത്. സംസ്ഥാനത്തിന്റെ സാങ്കേതിക മുന്നേറ്റത്തിൽ നിർണായക പങ്കുവഹിക്കുമെന്നു കരുതുന്ന ഈ പദ്ധതി, കേരളത്തിന്റെ ഹൈടെക് ആവാസ വ്യവസ്ഥയുമായുള്ള പങ്കാളിത്തത്തിന്റെ ഭാഗമായാണ് പ്രഖ്യാപിക്കപ്പെട്ടത്.
ഈ പദ്ധതിയിലൂടെ ഏകദേശം 12,000-ത്തിലധികം നേരിട്ടുള്ള തൊഴിലവസരങ്ങൾ സൃഷ്ടിക്കപ്പെടുമെന്നാണ് കണക്കാക്കുന്നത്. കൂടാതെ രണ്ടായിരത്തോളം പേർക്ക് പരോക്ഷമായും തൊഴിൽ ലഭിക്കാൻ സാധ്യതയുണ്ട്. ഓരോ ടവറിലും 4000 മുതൽ 5000 വരെ സീറ്റുകൾ ഉൾക്കൊള്ളാൻ ശേഷിയുണ്ടാകും. ടെക്നോപാർക്കിലെ ആദ്യത്തെ ഇരട്ട ടവർ ക്യാമ്പസ് എന്ന പ്രത്യേകതയും മെറിഡിയൻ ടെക് പാർക്കിനുണ്ട്. ഇത് കേരളത്തിന്റെ ഐടി മേഖലയ്ക്ക് പുതിയ ഊർജ്ജം പകരുമെന്നും ആഗോള സാങ്കേതിക വിപ്ലവത്തിന്റെ മുൻനിരയിലേക്ക് സംസ്ഥാനത്തെ എത്തിക്കാൻ സഹായിക്കുമെന്നും പ്രതീക്ഷിക്കുന്നു.
‘കേരളത്തിന്റെ വെർട്ടിക്കൽ ഇന്നൊവേഷൻ നെക്സസ്’ (Kerala’s Vertical Innovation Nexus) എന്ന് ബ്രാൻഡ് ചെയ്തിട്ടുള്ള ഈ ക്യാമ്പസ് ഒരു സാധാരണ കെട്ടിട സമുച്ചയം എന്നതിലുപരി അത്യാധുനികമായ ഒരു ഇന്നൊവേഷൻ ഇക്കോസിസ്റ്റമായാണ് സജ്ജമാവുക. ആർട്ടിഫിഷ്യൽ ഇന്റലിജൻസ് (AI), മെഷീൻ ലേണിങ്, ഏവിയേഷൻ ഐ.ടി., ഹെൽത്ത്കെയർ ഐ.ടി., റോബോട്ടിക്സ് തുടങ്ങിയ ഭാവി സാങ്കേതിക മേഖലകളിലായിരിക്കും ഇവിടെ പ്രധാനമായും ഊന്നൽ നൽകുക. ചെറുകിട കമ്പനികൾക്ക് പോലും നിർമ്മിത ബുദ്ധിയുടെ സാധ്യതകൾ ഉപയോഗിക്കാൻ സാധിക്കുന്ന രീതിയിൽ ഒരു എഐ ലബോറട്ടറിയും ഇവിടെ ഒരുങ്ങും.
പരിസ്ഥിതി സൗഹൃദ നിർമ്മിതിയാണ് മെറിഡിയൻ ടെക് പാർക്കിന്റെ മറ്റൊരു പ്രധാന സവിശേഷത. ലോകോത്തര നിലവാരം ഉറപ്പുവരുത്തുന്ന ലീഡ് പ്ലാറ്റിനം (LEED Platinum) സർട്ടിഫിക്കേഷൻ ലക്ഷ്യമിട്ടാണ് ഇതിന്റെ നിർമ്മാണം. കോൺഫറൻസുകൾ, ടെക്നോളജി ഉച്ചകോടികൾ, കോർപ്പറേറ്റ് ഇവന്റുകൾ എന്നിവയ്ക്കായി ഒരു രാജ്യാന്തര കൺവെൻഷൻ സെന്ററും കോർപ്പറേറ്റ് ഒത്തുചേരലിനും ഉൽപ്പന്നങ്ങളുടെ ലോഞ്ചിംഗിനും അനുയോജ്യമായ ഇടങ്ങളും ക്യാമ്പസിന്റെ ഭാഗമാകും. പദ്ധതിയുടെ താൽപര്യപത്രം (LoI) വ്യവസായ മന്ത്രി പി. രാജീവിന്റെ സാന്നിധ്യത്തിൽ അൽ മർസൂഖി ടെക് പാർക്ക് സിഇഒ അജീഷ് ബാലദേവനും ടെക്നോപാർക്ക് സിഇഒ സഞ്ജീവ് നായരും തമ്മിൽ കൈമാറിയതോടെയാണ് പദ്ധതിക്ക് ഔദ്യോഗികമായി തുടക്കമായത്.
