കൊളംബിയൻ പ്രസിഡന്റ് ഗുസ്താവോ പെട്രോയെ ഒരു “നിയമവിരുദ്ധ ലഹരിമരുന്ന് നേതാവ്” എന്ന് വിളിച്ച് യു.എസ്. പ്രസിഡന്റ് ഡൊണാൾഡ് ട്രംപ് രംഗത്തെത്തിയതോടെ ഇരു രാജ്യങ്ങളും തമ്മിലുള്ള ബന്ധം വഷളായിരിക്കുകയാണ്. കൊളംബിയയിൽ വൻതോതിൽ ലഹരിവസ്തുക്കളുടെ ഉൽപ്പാദനം നടക്കുന്നതിന് ഉത്തരവാദി പെട്രോ ആണെന്നും, യു.എസ് നൽകുന്ന സഹായങ്ങൾ ഉണ്ടായിരുന്നിട്ടും അദ്ദേഹം ലഹരിമരുന്ന് വ്യാപാരം തടയാൻ ഒന്നും ചെയ്യുന്നില്ലെന്നും ട്രംപ് ആരോപിച്ചു. ഈ ഗുരുതരമായ ആരോപണം ഇരു നേതാക്കളും തമ്മിൽ നിലവിലുള്ള സംഘർഷം വർദ്ധിപ്പിച്ചു.
ലഹരിവസ്തുക്കൾ ഉത്പാദിപ്പിക്കുന്ന ഈ “കൊലക്കളങ്ങൾ” ഉടൻ അടച്ചുപൂട്ടണമെന്നും, അല്ലെങ്കിൽ യുണൈറ്റഡ് സ്റ്റേറ്റ്സ് അത് “നല്ല രീതിയിലായിരിക്കില്ല” അടച്ചുപൂട്ടുകയെന്നും ട്രംപ് താക്കീത് നൽകി. മാത്രമല്ല, കൊളംബിയയ്ക്ക് നൽകുന്ന എല്ലാ ധനസഹായങ്ങളും സബ്സിഡികളും ഉടനടി നിർത്തലാക്കുമെന്നും ട്രംപ് പ്രഖ്യാപിച്ചു. ലഹരിമരുന്ന് കടത്ത് തടയാൻ സഹകരിക്കുന്നതിൽ കൊളംബിയ പരാജയപ്പെട്ടു എന്ന് നേരത്തെ ട്രംപ് ഭരണകൂടം ആരോപിച്ചിരുന്നുവെങ്കിലും, സഹായങ്ങൾ വെട്ടിച്ചുരുക്കുന്നതിൽ നിന്ന് യു.എസ്. ഇളവ് നൽകിയിരുന്നു. എന്നാൽ നിലവിലെ മുന്നറിയിപ്പ് സഹായം പൂർണ്ണമായും നിർത്തലാക്കുമെന്നുള്ള ഒരു കടുത്ത ഭീഷണിയാണ്.
ട്രംപിൻ്റെ ആരോപണങ്ങൾക്ക് മറുപടിയുമായി പ്രസിഡന്റ് പെട്രോ ശക്തമായി രംഗത്തെത്തി. താൻ കൊളംബിയയിൽ സമാധാനം സ്ഥാപിക്കാൻ ശ്രമിക്കുന്നയാളാണെന്നും, ലഹരിമരുന്ന് വ്യാപാരിയല്ലെന്നും അദ്ദേഹം പറഞ്ഞു. കൊളംബിയൻ ജനതയുടെ അന്തസ്സിനെ ബാധിക്കുന്നതാണ് ട്രംപിന്റെ പരാമർശങ്ങൾ എന്ന് പറഞ്ഞ പെട്രോ, കൊളംബിയൻ മണ്ണിൽ യുഎസ്സിന്റെ നിയമവിരുദ്ധമായ ഇടപെടലിനുള്ള നേരിട്ടുള്ള ഭീഷണിയാണ് ഈ പ്രസ്താവനയെന്ന് വിദേശകാര്യ മന്ത്രാലയം പ്രതികരിച്ചതായും കൂട്ടിച്ചേർത്തു. കൊക്കെയ്ൻ ലോകത്തെ ഏറ്റവും കൂടുതൽ കയറ്റുമതി ചെയ്യുന്ന രാജ്യമാണ് കൊളംബിയ.
കരീബിയൻ കടലിൽ നടന്ന യു.എസ് ആക്രമണങ്ങളെ ചൊല്ലിയും ഇരു രാജ്യങ്ങളും തമ്മിൽ തർക്കങ്ങൾ നിലനിന്നിരുന്നു. മയക്കുമരുന്ന് കടത്തുകാരെ ലക്ഷ്യമിട്ടാണ് ആക്രമണം നടത്തിയതെന്നാണ് യു.എസ്സിന്റെ വാദം. എന്നാൽ, സെപ്റ്റംബറിൽ നടന്ന ഒരു ആക്രമണത്തിൽ കൊളംബിയൻ മത്സ്യത്തൊഴിലാളി മരിച്ചതിന് പിന്നാലെ, യു.എസ്. ചെയ്തത് “കൊലപാതകമാണ്” എന്നും വിശദീകരണം വേണമെന്നും പെട്രോ ആവശ്യപ്പെട്ടിരുന്നു. ഈ പുതിയ സംഭവവികാസങ്ങളോടെ, ലാറ്റിൻ അമേരിക്കയിലെ യുഎസ്സിന്റെ അടുത്ത സഖ്യകക്ഷിയായ കൊളംബിയയുമായുള്ള ബന്ധം കൂടുതൽ വഷളായിരിക്കുകയാണ്.
