തുർക്കിയുടെ സൈനിക കാർഗോ വിമാനം ജോർജിയൻ അതിർത്തിയിൽ തകർന്നുവീണു. അസർബയ്ജാനിൽ നിന്ന് തുർക്കിയിലേക്ക് മടങ്ങുകയായിരുന്ന സി-130 കാർഗോ വിമാനമാണ് അപകടത്തിൽപ്പെട്ടത്. വിമാനത്തിൽ വിമാന ജോലിക്കാർ ഉൾപ്പെടെ 20 സൈനിക ഉദ്യോഗസ്ഥർ ഉണ്ടായിരുന്നതായി തുർക്കി പ്രതിരോധ മന്ത്രാലയം അറിയിച്ചു. ജോർജിയയിലെ സിഗ്നാഗി മുനിസിപ്പാലിറ്റിക്ക് സമീപം അസർബയ്ജാൻ അതിർത്തിയോട് ചേർന്നുള്ള പ്രദേശത്താണ് വിമാനം തകർന്നുവീണത്.
അപകടത്തെത്തുടർന്ന് വിമാനത്തിലുണ്ടായിരുന്ന മുഴുവൻ പേരും മരണപ്പെട്ടതായി തുർക്കി സർക്കാർ പിന്നീട് സ്ഥിരീകരിച്ചു. വിമാനം തകർന്നു വീഴുന്നതിന്റെ ദൃശ്യങ്ങൾ പ്രാദേശിക മാധ്യമങ്ങൾ പുറത്തുവിട്ടിട്ടുണ്ട്. വിമാനം നിയന്ത്രണം വിട്ട് കറങ്ങി താഴ്ന്നുപോകുന്നതും വലിയ പുക ഉയരുന്നതും ദൃശ്യങ്ങളിൽ കാണാമായിരുന്നു. സൈനികരെ കൊണ്ടുപോകുന്നതിനും മറ്റ് ലോജിസ്റ്റിക്കൽ ആവശ്യങ്ങൾക്കുമായി തുർക്കി സൈന്യം വ്യാപകമായി ഉപയോഗിക്കുന്ന വിമാനമാണ് സി-130 ഹെർക്കുലീസ്.
അപകടവിവരം അറിഞ്ഞയുടൻ തന്നെ തുർക്കി, ജോർജിയ, അസർബയ്ജാൻ എന്നീ രാജ്യങ്ങൾ സംയുക്തമായി രക്ഷാപ്രവർത്തനവും അന്വേഷണവും ആരംഭിച്ചു. തുർക്കി പ്രസിഡന്റ് റെസെപ് തയ്യിപ് എർദോഗൻ സംഭവത്തിൽ അഗാധമായ ദുഃഖം രേഖപ്പെടുത്തുകയും മരിച്ച സൈനികരെ ‘രക്തസാക്ഷികൾ’ എന്ന് വിശേഷിപ്പിക്കുകയും ചെയ്തു. അസർബയ്ജാൻ പ്രസിഡന്റ് ഉൾപ്പെടെ നിരവധി ലോക നേതാക്കളും അനുശോചനം അറിയിച്ചു.
അപകട കാരണം എന്താണെന്ന് ഇതുവരെ വ്യക്തമായിട്ടില്ല. ജോർജിയൻ വ്യോമമേഖലയിലേക്ക് പ്രവേശിച്ച ശേഷം ഏതാനും മിനിറ്റുകൾക്കുള്ളിൽ വിമാനവുമായുള്ള ബന്ധം നഷ്ടമായതായും വിമാനം അടിയന്തര സന്ദേശങ്ങളൊന്നും നൽകിയിട്ടില്ലെന്നും ജോർജിയൻ വ്യോമയാന അതോറിറ്റി അറിയിച്ചു. അപകടത്തിന്റെ കാരണം കണ്ടെത്താനായി വിശദമായ അന്വേഷണം നടന്നുവരികയാണ്.
