ശബരിമലയിൽ മണ്ഡലകാല തീർത്ഥാടനം പുരോഗമിക്കുന്നതിനിടെയുണ്ടായ അനിയന്ത്രിതമായ തിരക്കിന് ഇപ്പോൾ ആശ്വാസമായിട്ടുണ്ട്. തുടർച്ചയായി മൂന്ന് ദിവസങ്ങളിലായി ലക്ഷത്തോളം ഭക്തർ സന്നിധാനത്തേക്ക് എത്തിക്കൊണ്ടിരുന്നത് വലിയ തിരക്കിന് കാരണമായിരുന്നു. എന്നാൽ, ബുധനാഴ്ച രാത്രിയോടെ തീർഥാടകരുടെ വരവിൽ നേരിയ കുറവ് രേഖപ്പെടുത്തി. ഇതോടെ ശബരിമലയിലെ തിരക്കും നിയന്ത്രണവിധേയമായി. ഈ വർഷത്തെ മണ്ഡലകാലം ആരംഭിച്ച ശേഷം ഇതുവരെ മല ചവിട്ടിയ തീർഥാടകരുടെ എണ്ണം പത്ത് ലക്ഷം കടന്നതായാണ് കണക്കുകൾ സൂചിപ്പിക്കുന്നത്.
തിരക്ക് നിയന്ത്രിക്കുന്നതിൽ വീഴ്ച സംഭവിച്ചതായി ചൂണ്ടിക്കാട്ടി ഹൈക്കോടതി രൂക്ഷ വിമർശനം ഉന്നയിക്കുകയും ചില നിയന്ത്രണങ്ങൾ ഏർപ്പെടുത്തുകയും ചെയ്തിരുന്നു. ഇതിന്റെ ഭാഗമായി സ്പോട്ട് ബുക്കിംഗ് ദിവസേന 20,000 പേർക്ക് അനുവദിച്ചിരുന്നത് താൽക്കാലികമായി 5,000 ആയി കുറച്ചിരുന്നു. അനിയന്ത്രിതമായി ഭക്തർ എത്തിയാലുണ്ടാകാവുന്ന അപകടസാധ്യതകൾ മുൻനിർത്തിയാണ് കോടതി ഈ കർശന നടപടി സ്വീകരിച്ചത്. തിരക്ക് സംബന്ധിച്ച് ശബരിമല സ്പെഷ്യൽ കമ്മീഷണർ സമർപ്പിച്ച റിപ്പോർട്ടിന്റെ അടിസ്ഥാനത്തിലായിരുന്നു കോടതിയുടെ ഈ ഇടപെടൽ.
നിലവിലെ സാഹചര്യത്തിൽ ഭക്തജന തിരക്ക് കുറഞ്ഞതോടെ, ക്രമീകരണങ്ങൾ കൃത്യമായി നടപ്പിലാക്കാനും ഭക്തർക്ക് സുഖദർശനം സാധ്യമാക്കാനും കഴിയുന്നുണ്ട്. പമ്പയിൽ നിന്നും സന്നിധാനത്തേക്ക് മല ചവിട്ടുന്നവർക്ക് അധികം കാത്തുനിൽക്കാതെ ദർശനം നടത്താൻ സാധിക്കുന്നു. സന്നിധാനത്തെ തിരക്കിന് അനുസൃതമായാണ് ഇപ്പോൾ പമ്പയിൽ നിന്നും തീർത്ഥാടകരെ ഘട്ടംഘട്ടമായി കടത്തിവിടുന്നത്. നടപ്പന്തലുകളിലും വലിയ നിരകൾ ദൃശ്യമല്ല. എന്നാൽ തിരക്ക് വർധിക്കുന്നതനുസരിച്ച് സ്പോട്ട് ബുക്കിംഗിന്റെ എണ്ണം വർദ്ധിപ്പിക്കാമെന്നും ഹൈക്കോടതി പിന്നീട് നിർദ്ദേശം നൽകിയിരുന്നു.
അതേസമയം, വെർച്വൽ ക്യൂ ബുക്കിങ്ങോ സ്പോട്ട് ബുക്കിങ് പാസോ ഉള്ളവരെ മാത്രമേ സന്നിധാനത്തേക്ക് കടത്തിവിടാൻ പാടുള്ളൂ എന്ന് ഹൈക്കോടതി കർശനമായി നിർദ്ദേശിച്ചു. പാസിലെ സമയക്രമം ഭക്തർ കൃത്യമായി പാലിക്കണം. തീയതി തെറ്റി വരുന്നവരെയും വ്യാജ പാസുകളുമായി എത്തുന്നവരെയും ഒരു കാരണവശാലും കടത്തിവിടരുതെന്നും ജസ്റ്റിസുമാരായ വി. രാജ വിജയരാഘവനും കെ. വി. ജയകുമാറും ഉൾപ്പെട്ട ദേവസ്വം ബെഞ്ച് ഉത്തരവിട്ടു. നിലവിൽ വെർച്വൽ ക്യൂ ബുക്കിങ്ങിലൂടെ 70,000 പേർക്കും സ്പോട്ട് ബുക്കിങ് വഴി 5,000 പേർക്കുമാണ് പ്രതിദിനം ദർശനത്തിന് അനുമതി നൽകുന്നത്.
