മെസി ബാഴ്സലോണയിലേക്ക് തിരിച്ചെത്തുമോ? പുതിയ ചിത്രം വെെറൽ.

ലിയോണൽ മെസ്സി ബാഴ്‌സലോണയിലേക്ക് മടങ്ങിയെത്തുമോ എന്ന ആകാംഷ ഫുട്‌ബോൾ ലോകത്ത് വീണ്ടും സജീവമാക്കിക്കൊണ്ട് താരം അടുത്തിടെ കാമ്പ് നൗ സ്റ്റേഡിയം സന്ദർശിച്ചു. നിലവിൽ ഇന്റർ മയാമിയുടെ താരമായ മെസ്സി, എംഎൽഎസ് പ്ലേഓഫിലെ വിജയത്തിന് ശേഷമാണ് അപ്രതീക്ഷിതമായി ബാഴ്‌സയുടെ ഹോം ഗ്രൗണ്ടിലെത്തിയത്. സ്റ്റേഡിയം നവീകരണത്തിനായി അടച്ചിട്ടിരിക്കുകയാണെങ്കിലും മെസ്സി നടത്തിയ ഈ മടങ്ങി വരവ് ആരാധകർക്ക് വലിയ ആവേശം നൽകി.

കാമ്പ് നൗവിലെ സന്ദർശനത്തിന് ശേഷം മെസ്സി തൻ്റെ സോഷ്യൽ മീഡിയ അക്കൗണ്ടിൽ ഒരു വൈകാരിക കുറിപ്പും ചിത്രവും പങ്കുവെച്ചു. “ആത്മാവ് കൊണ്ട് ഞാൻ മിസ് ചെയ്യുന്ന ഒരിടത്തേക്ക് കഴിഞ്ഞ രാത്രി ഞാൻ മടങ്ങിയെത്തി. ഞാൻ അതിയായ സന്തോഷവാനായിരുന്ന ഒരിടം, നിങ്ങൾ എന്നെ ലോകത്തിലെ ഏറ്റവും സന്തോഷമുള്ള വ്യക്തിയാക്കി മാറ്റിയ ഒരിടം…” എന്നായിരുന്നു ആ വാക്കുകൾ. കാമ്പ് നൗവിലെ അന്തരീക്ഷം തനിക്ക് എത്രത്തോളം പ്രിയപ്പെട്ടതാണെന്ന് ഈ വാക്കുകളിലൂടെ താരം വീണ്ടും തുറന്നുപറയുകയായിരുന്നു.

മെസ്സിയുടെ ഈ കുറിപ്പ് ബാഴ്‌സലോണയിലേക്കുള്ള ഒരു തിരിച്ചുവരവിൻ്റെ സൂചനയായിട്ടാണ് ആരാധകർ കാണുന്നത്. 2021-ൽ ക്ലബ്ബിന്റെ സാമ്പത്തിക പ്രതിസന്ധി കാരണം ബാഴ്‌സ വിടേണ്ടി വന്നതിൽ മെസ്സിക്ക് കടുത്ത നിരാശയുണ്ടായിരുന്നു. കളിക്കാരനെന്ന നിലയിൽ ക്ലബ്ബിനോട് വിട പറയാൻ അവസരം ലഭിക്കാത്തതിലുള്ള ദുഃഖവും താരം പങ്കുവെച്ചു. “ഒരു കളിക്കാരനെന്ന നിലയിൽ വിട പറയാൻ എനിക്ക് ഒരിക്കലും അവസരം ലഭിച്ചില്ല, എങ്കിലും ഒരു ദിവസം എനിക്ക് അവിടേക്ക് മടങ്ങിയെത്താൻ കഴിയുമെന്ന് ഞാൻ പ്രതീക്ഷിക്കുന്നു…” എന്നും അദ്ദേഹം കുറിച്ചു.

എങ്കിലും നിലവിൽ ഇന്റർ മയാമിയുമായി മെസ്സിക്ക് കരാറുണ്ട്. കൂടാതെ, കളിക്കാരനെന്ന നിലയിൽ വിരമിച്ച ശേഷം ഇന്റർ മയാമിയുടെ സഹ ഉടമകളിൽ ഒരാളായി മാറാൻ മെസ്സി പദ്ധതിയിടുന്നുണ്ടെന്നും റിപ്പോർട്ടുകളുണ്ട്. അതുകൊണ്ടുതന്നെ താരത്തിന്റെ തിരിച്ചുവരവ് ഒരു കളിക്കാരനായിട്ടായിരിക്കുമോ അതോ ക്ലബ്ബിന്റെ അംബാസഡർ പോലുള്ള മറ്റൊരു റോളിലായിരിക്കുമോ എന്നത് വ്യക്തമല്ല. എങ്കിലും, മെസ്സിയുടെ ഈ വൈകാരിക സന്ദർശനവും കുറിപ്പും ബാഴ്‌സ ആരാധകരുടെ പ്രതീക്ഷകൾ വർദ്ധിപ്പിച്ചിരിക്കുകയാണ്.