തീരെ അടുത്തിടെ യുഎസിലെ ലൂയിസ്വില്ലെ മുഹമ്മദ് അലി അന്താരാഷ്ട്ര വിമാനത്താവളത്തിൽ നിന്ന് പറന്നുയർന്ന ഉടൻ ഒരു വലിയ യുപിഎസ് കാർഗോ വിമാനം തകർന്നു വീഴുകയും തീഗോളമായി പൊട്ടിത്തെറിക്കുകയും ചെയ്ത സംഭവം ലോകമെമ്പാടും ഞെട്ടലുണ്ടാക്കി. ഹൊനോലുലുവിലേക്ക് പോകുകയായിരുന്ന McDonnell Douglas MD-11F വിമാനമാണ് അപകടത്തിൽപ്പെട്ടത്. ടേക്ക് ഓഫിനായുള്ള ശ്രമത്തിനിടെ വിമാനത്തിന്റെ ഇടത് ചിറകിൽ തീജ്വാലകൾ ഉയരുന്നത് ദൃശ്യങ്ങളിൽ വ്യക്തമായിരുന്നു. ഇതോടെ റൺവേയിൽ നിന്ന് അൽപ്പമൊന്ന് ഉയർന്ന വിമാനം നിമിഷങ്ങൾക്കകം താഴേക്ക് പതിക്കുകയും വൻ സ്ഫോടനത്തോടെ തീഗോളമായി മാറുകയും ചെയ്യുകയായിരുന്നു.
ഈ ഭീകരമായ അപകടത്തിൽ മൂന്ന് പേർ മരിക്കുകയും 11 പേർക്ക് പരിക്കേൽക്കുകയും ചെയ്തതായി അധികൃതർ സ്ഥിരീകരിച്ചിട്ടുണ്ട്. മരണസംഖ്യ ഇനിയും ഉയരാൻ സാധ്യതയുണ്ടെന്ന് കെന്റക്കി ഗവർണർ ആൻഡി ബെഷീർ അറിയിച്ചു. വിമാനം തകർന്നുവീണതിനെത്തുടർന്ന് വൻ തീപ്പിടുത്തമാണ് സ്ഥലത്ത് ഉണ്ടായത്. ഇത് ആകാശത്തേക്ക് കട്ടിയുള്ള കറുത്ത പുക ഉയരാൻ കാരണമായി. സമീപത്തെ ഒരു കെട്ടിടത്തിന്റെ മേൽക്കൂരയുടെ ഒരു ഭാഗം പോലും കൂട്ടിയിടിയുടെ ആഘാതത്തിൽ തകർന്നുപോയി.
സംഭവത്തെ തുടർന്ന് വിമാനത്താവളത്തിന്റെ വടക്ക് ഭാഗത്തേക്കും ഓഹായോ നദിയിലേക്കും വ്യാപിക്കുന്ന പ്രദേശങ്ങളിൽ ആളുകൾക്ക് സുരക്ഷിത സ്ഥാനങ്ങളിൽ തുടരാൻ ‘ഷെൽട്ടർ-ഇൻ-പ്ലേസ്’ ഉത്തരവ് പുറപ്പെടുവിച്ചു. അപകടത്തെക്കുറിച്ച് ഫെഡറൽ ഏവിയേഷൻ അഡ്മിനിസ്ട്രേഷനും (FAA) നാഷണൽ ട്രാൻസ്പോർട്ടേഷൻ സേഫ്റ്റി ബോർഡും (NTSB) ചേർന്ന് വിശദമായ അന്വേഷണം ആരംഭിച്ചിട്ടുണ്ട്. വിമാനം തകരാനുള്ള യഥാർത്ഥ കാരണം കണ്ടെത്താനുള്ള ശ്രമത്തിലാണ് അന്വേഷണ ഏജൻസികൾ.
സംഭവം നടന്ന ലൂയിസ്വില്ലെ യുപിഎസ്സിന്റെ ഏറ്റവും വലിയ പാക്കേജ്-സോർട്ടിംഗ് ഹബ്ബ് സ്ഥിതി ചെയ്യുന്ന സ്ഥലമാണ്. ആയിരക്കണക്കിന് ആളുകൾ ഇവിടെ ജോലി ചെയ്യുന്നുണ്ട്. അപകടത്തെത്തുടർന്ന് വിമാനത്താവളത്തിലെ എല്ലാ ഇൻകമിംഗ്, ഔട്ട്ഗോയിംഗ് വിമാന സർവീസുകളും താൽക്കാലികമായി നിർത്തിവച്ചു. ജീവനക്കാരുടെ സുരക്ഷ ഉറപ്പാക്കാനുള്ള ശ്രമങ്ങൾ തുടരുന്നതിനിടയിൽ, അപകടത്തിൽപ്പെട്ടവർക്കും അവരുടെ കുടുംബങ്ങൾക്കും വേണ്ടി പ്രാർത്ഥിക്കണമെന്ന് മേയർ ഉൾപ്പെടെയുള്ളവർ ജനങ്ങളോട് അഭ്യർത്ഥിച്ചു.
