ശബരിമല മണ്ഡല-മകരവിളക്ക് തീർഥാടനത്തിനുള്ള വെർച്വൽ ക്യൂ ബുക്കിംഗ് ഇന്ന് (നവംബർ 1) മുതൽ ആരംഭിച്ചു. തിരക്ക് നിയന്ത്രിക്കുന്നതിനും ഭക്തർക്ക് സുഗമമായ ദർശനം ഉറപ്പാക്കുന്നതിനുമായാണ് തിരുവിതാംകൂർ ദേവസ്വം ബോർഡ് വെർച്വൽ ക്യൂ സംവിധാനം ഏർപ്പെടുത്തിയിരിക്കുന്നത്. പ്രതിദിനം 70,000 ഭക്തർക്കാണ് വെർച്വൽ ക്യൂ വഴി ഓൺലൈനായി ദർശനത്തിന് അവസരം ലഭിക്കുക. ഇതിനുപുറമെ, സ്പോട്ട് ബുക്കിംഗ് വഴിയും പ്രതിദിനം 20,000 പേർക്ക് വരെ ദർശനം അനുവദിക്കാൻ സാധ്യതയുണ്ട്.
വെർച്വൽ ക്യൂ വഴി ബുക്ക് ചെയ്യുന്നതിനായി ഭക്തർ sabarimalaonline.org എന്ന ഔദ്യോഗിക വെബ്സൈറ്റ് സന്ദർശിക്കണം. ആദ്യമായി ബുക്ക് ചെയ്യുന്നവർ ഒരു പുതിയ യൂസർ ഐ.ഡി. ഉണ്ടാക്കി രജിസ്ട്രേഷൻ പൂർത്തിയാക്കണം. ഇതിനായി പേര്, ജനന തീയതി, മേൽവിലാസം, ഫോൺ നമ്പർ, ഇ-മെയിൽ ഐ.ഡി., ഒരു തിരിച്ചറിയൽ രേഖ (ആധാർ കാർഡ്, വോട്ടേഴ്‌സ് ഐ.ഡി. കാർഡ്, പാസ്പോർട്ട്, പാൻകാർഡ് എന്നിവയിൽ ഏതെങ്കിലും ഒന്ന്), സ്കാൻ ചെയ്ത പാസ്പോർട്ട് സൈസ് ഫോട്ടോ എന്നിവ നൽകേണ്ടതുണ്ട്. മൊബൈൽ നമ്പറിലേക്ക് ലഭിക്കുന്ന ഒ.ടി.പി. നൽകി വേണം രജിസ്ട്രേഷൻ പൂർത്തിയാക്കാൻ.
രജിസ്ട്രേഷൻ പൂർത്തിയാക്കിയ ശേഷം, നേരത്തെ സൃഷ്ടിച്ച ഇ-മെയിൽ ഐ.ഡിയും പാസ് വേഡും ഉപയോഗിച്ച് വെബ്സൈറ്റിൽ ലോഗിൻ ചെയ്യുക. തുടർന്ന് ‘വെർച്വൽ ക്യൂ’ (Virtual Queue) എന്ന ബട്ടൺ അമർത്തി, നിങ്ങൾക്ക് ദർശനം നടത്തേണ്ട തീയതിയും സമയവും തിരഞ്ഞെടുക്കാവുന്നതാണ്. ഒരു അക്കൗണ്ടിൽ പരമാവധി 10 പേർക്ക് വരെ ബുക്ക് ചെയ്യാൻ സാധിക്കും. ബുക്കിംഗ് ചെയ്യുന്ന ഓരോ വ്യക്തിയുടെയും വിവരങ്ങൾ (തിരിച്ചറിയൽ രേഖയും ഉൾപ്പെടെ) കൃത്യമായി നൽകി ‘Add Pilgrim’ എന്ന ഓപ്ഷൻ വഴി ചേർക്കണം.
ദർശനത്തിനുള്ള തീയതിയും സമയവും തിരഞ്ഞെടുത്ത ശേഷം ബുക്കിംഗ് കൺഫേം ചെയ്യാം. ബുക്കിംഗ് വിജയകരമായി പൂർത്തിയാക്കിയാൽ, പി.ഡി.എഫ്. രൂപത്തിലുള്ള ബുക്കിംഗ് ഐ.ഡി. (വെർച്വൽ ക്യൂ പാസ്) ഡൗൺലോഡ് ചെയ്ത് സൂക്ഷിക്കണം. ഇൻഷുറൻസ് പരിരക്ഷ ലഭിക്കുന്നതിന് ഇത് അടിസ്ഥാന രേഖയായി പരിഗണിക്കുന്നതിനാൽ പാസിൻ്റെ പകർപ്പ് ദർശന സമയത്ത് കൈവശം വെക്കേണ്ടത് അത്യാവശ്യമാണ്. 5 വയസ്സിൽ താഴെയുള്ള കുട്ടികൾക്ക് വെർച്വൽ ക്യൂ ബുക്കിംഗ് ആവശ്യമില്ല.
