യുഎഇയിലെ ആരോഗ്യമേഖലയിൽ നിന്നുള്ള ഡോക്ടർമാർ രാജ്യത്ത് ഭക്ഷ്യവിഷബാധ കേസുകൾ വർധിക്കുന്നതിനെക്കുറിച്ച് മുന്നറിയിപ്പ് നൽകിയിരിക്കുകയാണ്. പ്രത്യേകിച്ച് വേനൽക്കാലത്ത് താപനില വർദ്ധിക്കുന്നതോടെയാണ് ഇത്തരം കേസുകൾ കൂടുന്നതെന്നാണ് വിദഗ്ധർ ചൂണ്ടിക്കാണിക്കുന്നത്. കാലാവസ്ഥയിലെ ഈ മാറ്റം ഭക്ഷ്യവസ്തുക്കളിൽ ബാക്ടീരിയകൾ വളരാൻ അനുകൂലമായ സാഹചര്യം ഒരുക്കുന്നു. ശരിയായ രീതിയിൽ ഭക്ഷണം സൂക്ഷിക്കുകയും കൈകാര്യം ചെയ്യുകയും പാചകം ചെയ്യുകയും ചെയ്യാത്തതാണ് ഈ വർദ്ധനവിന് പ്രധാന കാരണം.
ഉയർന്ന താപനിലയാണ് ഭക്ഷ്യവിഷബാധ കേസുകൾ കൂടുന്നതിനുള്ള ഒരു പ്രധാന കാരണം. ചൂടേറിയ കാലാവസ്ഥയിൽ സാൽമൊണെല്ല, റോട്ടവൈറസ് പോലുള്ള ബാക്ടീരിയകൾ അതിവേഗം പെരുകുന്നു. ഭക്ഷണം ശരിയായി ശീതീകരിക്കാതിരിക്കുക, പാചകം ചെയ്യാൻ ഉപയോഗിക്കുന്ന വെള്ളത്തിന്റെ ശുചിത്വമില്ലായ്മ, പാചകം ചെയ്യുന്നവരുടെ വ്യക്തിശുചിത്വം ഇല്ലാത്തത്, പാചകം ചെയ്ത ഭക്ഷണം തുറന്നുവെക്കുക എന്നിവയെല്ലാം രോഗാണുക്കൾക്ക് പെരുകാൻ അവസരം നൽകുന്നു. റസ്റ്റോറന്റുകളിലും വീടുകളിലും ഇത് സംഭവിക്കാൻ സാധ്യതയുണ്ട്.
അഞ്ചു വയസ്സിൽ താഴെയുള്ള കുട്ടികൾ, 65 വയസ്സിനു മുകളിലുള്ളവർ, പ്രതിരോധശേഷി കുറഞ്ഞവർ (ഗർഭിണികൾ, കാൻസർ രോഗികൾ, എച്ച്‌ഐവി ബാധിതർ, പ്രമേഹരോഗികൾ, പ്രതിരോധശേഷി കുറയ്ക്കുന്ന മരുന്നുകൾ കഴിക്കുന്നവർ) എന്നിവർക്കാണ് ഭക്ഷ്യവിഷബാധ എളുപ്പത്തിൽ പിടിപെടാൻ സാധ്യതയുള്ളതെന്ന് ഡോക്ടർമാർ മുന്നറിയിപ്പ് നൽകുന്നു. നിർജലീകരണം, വയറിളക്കം, കടുത്ത പനി, ഛർദ്ദി, തലകറക്കം, കുറഞ്ഞ മൂത്രവിസർജ്ജനം എന്നിവയാണ് പ്രധാന ലക്ഷണങ്ങൾ. ഈ ലക്ഷണങ്ങൾ കണ്ടാൽ ഉടൻ വൈദ്യസഹായം തേടേണ്ടത് അത്യാവശ്യമാണ്.
ഭക്ഷ്യവിഷബാധ തടയാൻ വ്യക്തിശുചിത്വം പാലിക്കുക, ഭക്ഷണം ശരിയായി പാചകം ചെയ്യുക, പാകം ചെയ്ത ഭക്ഷണവും പാകം ചെയ്യാത്ത ഭക്ഷണവും വെവ്വേറെ സൂക്ഷിക്കുക, പാചകം ചെയ്ത ഭക്ഷണം എത്രയും പെട്ടെന്ന് കഴിക്കുക അല്ലെങ്കിൽ ശരിയായ താപനിലയിൽ സൂക്ഷിക്കുക, പഴങ്ങളും പച്ചക്കറികളും കഴുകി ഉപയോഗിക്കുക തുടങ്ങിയ കാര്യങ്ങളിൽ ശ്രദ്ധിക്കണമെന്ന് ആരോഗ്യ വിദഗ്ധർ നിർദ്ദേശിക്കുന്നു. യുഎഇയിലെ കാലാവസ്ഥാ മാറ്റങ്ങൾക്കനുസരിച്ച് ഭക്ഷ്യസുരക്ഷ ഉറപ്പാക്കുന്നതിനുള്ള നടപടികൾ സ്വീകരിക്കേണ്ടത് അത്യാവശ്യമാണ്.
